បរទេស៖ លោក Dmitry Medvedev អតីតប្រធានាធិបតីរុស្ស៊ី និងជាអនុប្រធានបច្ចុប្បន្ន នៃក្រុមប្រឹក្សាសន្តិសុខ បានជួបជាមួយប្រធានាធិបតីចិន លោក Xi Jinping កាលពីថ្ងៃពុធ ក្នុងអំឡុងទស្សនកិច្ច នៅទីក្រុងប៉េកាំង។
យោងតាមសារព័ត៌មាន RT ចេញផ្សាយនៅថ្ងៃទី២១ ខែធ្នូ ឆ្នាំ២០២២ បានឱ្យដឹងថា ការិយាល័យរបស់លោក Medvedev បាននិយាយថា ក្នុងអំឡុងពេលជួបជាមួយលោក Xi លោក Medvedev បានផ្ញើសារផ្ទាល់ខ្លួនមួយ ពីប្រធានាធិបតីរុស្ស៊ី លោក Vladimir Putin នេះបើយោងតាមប្រព័ន្ធ ផ្សព្វផ្សាយរុស្ស៊ី។
បើតាមសារព័ត៌មានចិន ស៊ិនហួ Xinhua បានផ្សាយថា គឺមានសារស្វាគមន៍យ៉ាងរួសរាយរាក់ទាក់ និងជូនពរដល់លោក Xi ដែលបានស្នើឱ្យភ្ញៀវរបស់លោកបង្ហាញ ការឆ្លើយតប របស់លោកដោយសប្បុរស ចំពោះមេដឹកនាំរុស្ស៊ី។
នៅក្នុងសេចក្តីថ្លែងការណ៍ខ្លីមួយ អំពីលក្ខណៈនៃកិច្ចប្រជុំនេះ លោក Medvedev បាននិយាយថា លោក និងម្ចាស់ផ្ទះចិនបានពិភាក្សាអំពីកិច្ចសហប្រតិបត្តិការផ្ទៃក្នុងភាគី ក្នុងចំណោមរឿងផ្សេងទៀត។ លោក Xi ត្រូវបានជាប់ឆ្នោតជាអគ្គលេខាធិការបក្សកុម្មុយនិស្តចិនសាជាថ្មីក្នុងខែតុលា។ លោក Medvedev ដឹកនាំគណបក្ស United Russia ដែលកាន់អំណាច។
លោក Medvedev បានបន្ថែមថា មន្ត្រីទាំងពីរ ក៏បានពិភាក្សាអំពីទំនាក់ទំនងទ្វេភាគី រវាងចិន និងរុស្ស៊ី ព្រមទាំងកិច្ចការអន្តរជាតិ រួមទាំងវិបត្តិនៅអ៊ុយក្រែនផងដែរ។ លោកបានហៅការពិភាក្សាគ្នានេះថា «មានប្រយោជន៍ខ្លាំងណាស់»៕
ប្រែសម្រួលៈ ណៃ តុលា
