លោក គីម ជុងអ៊ុន ដឹកនាំកិច្ចប្រជុំ សម្រាប់ការត្រៀមខ្លួន ធ្វើសង្គ្រាម

ប៉េកាំង៖ ប្រព័ន្ធផ្សព្វផ្សាយរដ្ឋបាននៅថ្ងៃអង្គារនេះបានឲ្យដឹងថា ប្រទេសកូរ៉េខាងជើង បានពិភាក្សាអំពីវិធីពង្រីក និងបង្កើនសមយុទ្ធប្រយុទ្ធសម្រាប់ “ភាពល្អឥតខ្ចោះ” នៃការត្រៀមខ្លួនសង្រ្គាមរបស់ខ្លួននៅក្នុងកិច្ចប្រជុំដែលដឹកនាំដោយមេដឹកនាំលោក គីម ជុងអ៊ុន។

វត្តមានរបស់លោក គីម នៅឯកិច្ចប្រជុំធំកាលពីថ្ងៃចន្ទ នៃគណៈកម្មាធិការយោធាមជ្ឈិមនៃគណបក្សពលករដែលកំពុងកាន់អំណាចនៃប្រទេសកូរ៉េបានកត់សម្គាល់ការរាយការណ៍ដំបូងនៃសកម្មភាពសាធារណៈរបស់លោកដោយទីភ្នាក់ងារសារព័ត៌មានកណ្តាលកូរ៉េជាផ្លូវការចាប់តាំងពីថ្ងៃទី០២ ខែមករា។

យោងតាម ​​KCNA បានឱ្យដឹងថា កិច្ចប្រជុំបានពិភាក្សាយ៉ាងស៊ីជម្រៅអំពីកិច្ចការយោធា និងនយោបាយសំខាន់ៗសម្រាប់ឆ្នាំ២០២៣ និងបញ្ហារយៈពេលវែងទាក់ទងនឹងការតំរង់ទិសសម្រាប់ការកសាងកងកម្លាំងប្រដាប់អាវុធ។

លោក គីម បានសម្តែងនូវ “ការរំពឹងទុក និងជំនឿ” របស់លោកថា កងកម្លាំងប្រដាប់អាវុធរបស់ប្រទេសនឹងអនុវត្ត “ជោគជ័យដែលមិនធ្លាប់មាន ក្នុងការពង្រឹង និងអនុវត្តយ៉ាងខ្ជាប់ខ្ជួន” នូវភារកិច្ចរបស់គណបក្សជាមួយនឹង “កម្លាំងយោធាដែលមិនអាចផ្គូផ្គងបាន” ។

ប្រភពពី KCNA បានឲ្យដឹងថា ការជួបជុំនេះត្រូវបានធ្វើឡើងក្នុងខួបលើកទី៦០ នៃការណែនាំដែលផ្តល់ដោយស្ថាបនិករបស់ប្រទេសគឺលោក គីម អ៊ីលស៊ុង ក្នុងឆ្នាំ១៩៦៣ សម្រាប់ការកសាងកងទ័ពដ៏មានឥទ្ធិពលមួយ។

វាក៏បានកើតឡើងនៅមុនខួបលើកទី៧៥ នៃការបង្កើតកងទ័ពប្រជាជនកូរ៉េកាលពីថ្ងៃពុធ នៅពេលដែលទីក្រុងព្យុងយ៉ាងអាចធ្វើព្យុហយាត្រាយោធាដែលមានកាំជ្រួចផ្លោងអន្តរទ្វីប៕ប្រែសម្រួល ឈូក បូរ៉ា