បរទេស ៖ ប្រព័ន្ធផ្សព្វផ្សាយរដ្ឋបានរាយការណ៍ កាលពីថ្ងៃអាទិត្យថា អាជ្ញាធរចិន កំពុងរៀបចំបាញ់ទម្លាក់ “វត្ថុហោះមិនស្គាល់អត្តសញ្ញាណ” នៅជិតទីក្រុងឆ្នេរសមុទ្រ Rizhao ក្នុងខេត្ត Shandong ភាគខាងកើតប្រទេសចិន ។ ហេតុការណ៍នេះ កើតឡើងបន្ទាប់ពីយន្តហោះចម្បាំង អាមេរិកបានបាញ់ ទម្លាក់ឧបករណ៍ស្រដៀងគ្នា ចំនួនបីក្នុងមួយសប្តាហ៍ ដែលមួយក្នុងចំណោម នោះមានប្រភពមកពីប្រទេសចិន។
យោងតាមសារព័ត៌មាន RT ចេញផ្សាយនៅថ្ងៃទី១២ ខែកុម្ភៈ ឆ្នាំ២០២៣ បានឱ្យដឹងថា កាសែត Global Times បានរាយការណ៍ថា UFO ត្រូវបានប្រទះឃើញដោយ “អាជ្ញាធរដែនសមុទ្រក្នុងតំបន់” ដោយបន្ថែមថា អាជ្ញាធរដូចគ្នាកំពុងរៀបចំការ បាញ់ប្រហារលើ UFO នោះ។ អ្នកនេសាទដែលធ្វើការនៅជិតទីក្រុងកំពង់ផែត្រូវបានផ្ញើសារណែនាំពួកគេឱ្យទៅកន្លែង”មានសុវត្ថិភាព” ។
មិនមានការពិពណ៌នា បន្ថែម អំពីយន្តហោះនេះ ត្រូវបានផ្តល់ឱ្យនោះទេ ហើយវាមិនត្រូវបានគេពន្យល់ច្បាស់ អំពីរបៀបដែលអាជ្ញាធរមានផែនការ ក្នុងការបាញ់ទម្លាក់នោះដែរ។
UFO ត្រូវបានរកឃើញប៉ុន្មានម៉ោង បន្ទាប់ពីយន្តហោះចម្បាំង F-22 របស់អាមេរិកបានបាញ់ទម្លាក់វត្ថុមិនស្គាល់អត្តសញ្ញាណ និងគ្មានមនុស្សបើកនៅ លើដែនអាកាសនៃប្រទេសកាណាដា។ ថ្លែងទៅកាន់ Fox News មន្ត្រីអាមេរិកបានពណ៌នា វត្ថុនោះថា ជា “បាឡុងលោហធាតុតូចមួយដែលមានខ្សែភ្ជាប់” ខណៈដែលរបាយការណ៍ប្រព័ន្ធផ្សព្វផ្សាយ ផ្សេងទៀតបានពណ៌នាថាវាជា “រាងស៊ីឡាំង” ៕
