អតីត ទីប្រឹក្សាសន្តិសុខជាតិ អាមេរិក ថា អាមេរិកអាចនឹងបំផ្លាញរោងចក្រ ផលិតបន្ទះឈីប របស់កោះតៃវ៉ាន់ ដើម្បីកុំឱ្យចិនយកបានមុន

បរទេស៖ ទីក្រុងវ៉ាស៊ីនតោន មានការប្តេជ្ញាចិត្តយ៉ាងខ្លាំង ក្នុងការរារាំងប្រទេសចិន ពីការដណ្តើមគ្រប់គ្រងឧស្សាហកម្ម semiconductor របស់កោះតៃវ៉ាន់ ដែលអាមេរិកនឹងបំផ្លាញ រោងចក្រផលិតបន្ទះឈីបនៅក្នុងព្រឹត្តិការណ៍ នៃ “ការឈ្លានពាន” ដោយកងកម្លាំងរបស់ទីក្រុងប៉េកាំង, នេះបើតាម អតីតទីប្រឹក្សាសន្តិសុខជាតិអាមេរិកលោក Robert O’Brien បាននិយាយកាលពីថ្ងៃចន្ទ។

យោងតាមសារព័ត៌មាន RT ចេញផ្សាយនៅថ្ងៃទី១៤ ខែមីនា ឆ្នាំ២០២៣ បានឱ្យដឹងថា លោក O’Brien បានប្រាប់សារព័ត៌មានអនឡាញ Semafor ថា “សហរដ្ឋអាមេរិក និងសម្ព័ន្ធមិត្ត នឹងមិនអនុញ្ញាតឱ្យរោងចក្រទាំងនោះធ្លាក់ទៅក្នុងដៃរបស់ចិនឡើយ” ។ លោកបានបន្ថែមថា ការអនុញ្ញាតឱ្យចិន ចាប់យករោងចក្រនោះ គឺនឹងធ្វើឱ្យបក្សកុម្មុយនិស្តចិន (CCP) “ដូចជា OPEC ថ្មីនៃបន្ទះឈីបស៊ីលីកុន” ដែលអនុញ្ញាតឱ្យចិន”គ្រប់គ្រងសេដ្ឋកិច្ចពិភពលោក” បាន។

លោក O’Brien ដែលបានបម្រើការ ជាទីប្រឹក្សាសន្តិសុខជាតិក្រោមការដឹកនាំ របស់ប្រធានាធិបតី Donald Trump ពីឆ្នាំ ២០១៩ ដល់ខែមករា ឆ្នាំ ២០២១ មិនបានបញ្ជាក់ពីថាតើវាជាគោលនយោបាយផ្លូវការរបស់សហរដ្ឋអាមេរិកនៅចំណុចណាមួយក្នុងការវាយកម្ទេចរោងចក្រ semiconductor របស់កោះតៃវ៉ាន់ ដើម្បីរារាំងទីក្រុងប៉េកាំងនោះទេ។

នៅពេលសួរថាតើរោងចក្រពិតជានឹង “បាត់បង់” នៅក្នុងសេណារីយ៉ូបែបនេះឬអត់? លោកបាននិយាយថា “ខ្ញុំមិននឹកស្រមៃថា រោងចក្រទាំងនោះ នឹងមិនខូចខាតទេ” ៕

ប្រែសម្រួលៈ ណៃ តុលា