ភ្នំពេញ៖ នាឱកាសឈានថ្ងៃទី២ នៃបុណ្យចូលឆ្នាំខ្មែរ ត្រូវនឹងថ្ងៃទី១៥ ខែមេសា ឆ្នាំ២០២៣ អ្នកបើកទូកទេសចរ ប្រចាំអន្លង់កាំពី បានប្រទះឃើញកូនផ្សោតកើតថ្មី ចំនួន១ក្បាល កំពុងហែលលេង ជាមួយហ្វូងផ្សោតពេញវ័យ ជាច្រើនទៀតនៅអន្លង់កាំពី ភូមិកាំពី ឃុំ ស្រុកចិត្របុរី ខេត្តក្រចេះ ។ នេះបើតាមក្រសួងកសិកម្ម រុក្ខាប្រមាញ់ និងនេសាទ ។
ក្រោយអ្នកបើកទូកទេសចរ បានឃើញហើយ ក៏រាយការណ៍មកប្រធានឆ្មាំទន្លេ និងមន្ត្រីជលផលខេត្តក្រចេះ និងបុគ្គលិកអង្គការ WWFដើម្បីជាព័ត៌មាន កត់ត្រានិងតាមដានបន្តទៀត ។ ថ្ងៃទី១៨ ខែមេសា ឆ្នាំ២០២៣ ក្រុមស្រាវជ្រាវ នៃខណ្ឌជលផលខេត្តក្រចេះ និងអង្គការ WWF បានចុះតាមដាន កូនផ្សោតទើបកើតថ្មី ដោយតាមការប៉ាន់ប្រមាណកូនផ្សោតនេះ ទើបតែមានអាយុប្រមាណ៣ថ្ងៃ ។ នេះជាកូនផ្សោតទី២ ដែលបានកត់ត្រា នៅឆ្នាំ២០២៣ ។
សូមបញ្ជាក់ជូនថា នៅឆ្នាំ២០២២ ក្រុមការងារក៏បានកត់ត្រា កូនផ្សោតបានចំនួន៦ក្បាល និងនៅឆ្នាំ២០២១ ក្រុមការងារបានកត់ត្រា កូនផ្សោតបានចំនួន៦ក្បាល ៕
