ភ្នំពេញ៖ តាមការគ្រោងទុកនៅថ្ងៃទី៩ ខែមិថុនា ឆ្នាំ២០២៣ខាងមុខនេះ ដល់ពេលកំណត់ នៃការបិទជាផ្លូវការ នូវព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីកម្ពុជា ។
ដើម្បីញ៉ាំងឲ្យកម្មវិធីនេះ កាន់តែអធឹកអធមបន្ថែមទៀតនោះ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ (CAMSOC-CAMAPGOC) បានអំពាវនាវឲ្យសាធារណជនទាំងជាតិ និងអន្តរជាតិចូលរួម ទស្សនាព្រឹត្តិការណ៍នេះ ឲ្យកាន់តែច្រើនកុះករ នៅវិមានកីឡដ្ឋានពហុកីឡដ្ឋានជាតិមរតកតេជោ ។
ចំពោះបណ្ណចូលទស្សនា និងបណ្ណរថយន្ត អ្នកចូលរួមប្រើប្រាស់ឡើងវិញ នូវបណ្ណដែលគណៈកម្មាធិការជាតិ បានផ្ដល់ជូនក្នុងពេលពិធីបើកជាផ្លូវការ ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ កាលពីថ្ងៃទី៣ មិថុនា។ ក្នុងនោះធ្វើយ៉ាងណា ឲ្យមកដល់ពហុកីឡដ្ឋានជាតិមរតកតេជោ នៅវេលាម៉ោង១៦រសៀល ដោយរក្សាទីតាំង កន្លែងអង្គុយដូចដែលមានកំណត់ ក្នុងបណ្ណទស្សនារួចហើយ ៕
