បរទេស៖ ទិន្នន័យដែលចេញផ្សាយ ដោយការិយាល័យជំរឿនផ្នែកទំនិញអាមេរិក បានបង្ហាញនៅថ្ងៃព្រហស្បតិ៍ថា សហរដ្ឋអាមេរិក បានបង្កើនការនាំចូលទំនិញពីប្រទេសរុស្ស៊ី បើទោះបីជាមានទណ្ឌកម្មសេដ្ឋកិច្ចជាច្រើន លើប្រទេសនេះក៏ដោយ។
យោងតាមសារព័ត៌មាន RT ចេញផ្សាយនៅថ្ងៃទី៨ ខែកក្កដា ឆ្នាំ២០២៣ បានឱ្យដឹងថា នៅក្នុងខែឧសភា បរិមាណនៃផលិតផលដែលបាននាំចូលពីប្រទេសរុស្ស៊ី ដែលត្រូវបានដាក់ទណ្ឌកម្ម បានកើនឡើង និងមានចំនួន ៥០៤ លានដុល្លារ, នេះបើយោងតាមរបាយការណ៍។
នេះគឺច្រើនជាងចំនួនទ្វេដង ពីខែមេសា ដែលក្រុងវ៉ាស៊ីនតោន បានទិញទំនិញដែលមានតម្លៃ ២១៥,៦ លានដុល្លារពីរុស្ស៊ី។
នៅក្នុងខែកុម្ភៈ ការនាំចូលទំនិញរបស់សហរដ្ឋអាមេរិក បានឈានដល់កម្រិតខ្ពស់បំផុតក្នុងឆ្នាំ ២០២៣ ដែលមានចំនួន ៦៤២,៨ លានដុល្លារ។
ទន្ទឹមនឹងនោះ ការនាំចេញរបស់អាមេរិក ទៅកាន់រុស្ស៊ីបន្តធ្លាក់ចុះ។ ទិន្នន័យបានបង្ហាញថា នៅក្នុងខែឧសភា បរិមាណនៃទំនិញនាំចេញបានធ្លាក់ចុះដល់ ៦០ លានដុល្លារពី ៦៥,២លានដុល្លារកាលពីខែមុន និង ៦៦,៤លានដុល្លារនៅក្នុងខែមីនា។ នៅក្នុងខែមករា ការនាំចេញរបស់អាមេរិក ទៅកាន់ប្រទេសរុស្ស៊ីមានចំនួនសរុប ៤៤,៦ លានដុល្លារ។
បន្ទាប់ពីការបើកប្រតិបត្តិការយោធារបស់រុស្ស៊ី ក្នុងប្រទេសអ៊ុយក្រែន កាលពីខែកុម្ភៈកន្លងទៅ ទីក្រុងវ៉ាស៊ីនតោនបានដាក់ទណ្ឌកម្មលើទីក្រុងមូស្គូ ដោយហាមឃាត់ទំនិញរុស្ស៊ី មួយចំនួនពីក្នុងស្រុកអាមេរិក។ ការរឹតបន្តឹងនេះផ្តោតសំខាន់ លើការនាំចេញថាមពលរបស់រុស្ស៊ី ប៉ុន្តែរួមបញ្ចូលផងដែរនូវគ្រឿងស្រវឹង ផលិតផលអាហារសមុទ្រ និងត្បូងពេជ្រមិនមែនឧស្សាហកម្ម ក្នុងចំណោមរបស់ផ្សេងៗទៀត៕
ប្រែសម្រួលៈ ណៃ តុលា
