ភ្នំពេញ៖ លោកឧកញ៉ាសមូហកបណ្ឌិត ឡី សុភាព ប្រធានសមាគមសម្ពន្ធភាព អង្គការ-សមាគម និងវិស័យឯកជននៅកម្ពុជា និងជាប្រធានសមាគម សហព័ន្ធវិនិយោគិនកម្ពុជា បានចាត់ទុក វេទិកាសេដ្ឋកិច្ចឆ្នាំ២០២៣ លើកទី១ ជាតាក់តាងប្រវត្តិសាស្ត្រថ្មីមួយ សម្រាប់កម្ពុជា និងត្រូវបានកត់ត្រាទុក សម្រាប់យុវជន ឬអ្នកបន្តវេនជំនាន់ក្រោយ បានដឹងនិងមានមោទនភាព ។
លោកឧកញ៉ាសមូហកបណ្ឌិត ឡី សុភាព ក្នុងវេទិកាសេដ្ឋកិច្ចឆ្នាំ២០២៣ លើកទី១នេះ ដែលមានអ្នកចូលរួម ប្រមាណជិត៦ពាន់នាក់ នាថ្ងៃទី១៦ ខែកក្កដា ឆ្នាំ២០២៣ នាសាលកោះពេជ្រ បានលើកឡើងថា “ក្នុងនាមសមាគម សម្ពន្ធភាពអង្គការ-សមាគម និងវិស័យឯកជននៅកម្ពុជា និងក្នុងនាមខ្ញុំផ្ទាល់ ខ្ញុំសូមអបអរសាទរ ជាមួយថ្នាក់ដឹកនាំ វិនយោគិន ពាណិជ្ជករ អាជីវករ ភ្នាក់ងារទីផ្សារ ស្វ័យនិយោជន៏ អ្នកជំនាញវិជ្ជាជីវៈ ដៃគូរអភិវឌ្ឋន៍សមាជិក សមាជិកា សេដ្ឋកិច្ចក្រៅប្រព័ន្ធ និងបងប្អូនជនរួមជាតិទាំងអស់ ក្នុងឱកាសវេទិកាសេដ្ឋកិច្ចឆ្នាំ២០២៣ ដ៏ឱឡារឹកនាពេលនេះ នេះពិតជាកិច្ចការងារសំខាន់” ។
ពាក់ព័ន្ធជាមួយ វេទិកាសេដ្ឋកិច្ចឆ្នាំ២០២៣នេះ លោកឧកញ៉ាសមូហកបណ្ឌិត ឡី សុភាព យល់ឃើញថា បានមកដោយសារកត្កាសេដ្ឋកិច្ចកម្ពុជារីកចម្រើន ហើយក្នុងនោះសមាជិកសមាជិកាទាំងអស់ សុទ្ធតែមានការរួមចំណែក ។
វេទិកាសេដ្ឋកិច្ចឆ្នាំ២០២៣ លើកទី១នេះ ត្រូវបានលោកឧកញ៉ាសមូហកបណ្ឌិត ឡី សុភាព ចាត់ទុកថា ជាតាក់តាងប្រវត្តិសាស្ត្រថ្មីមួយ សម្រាប់កម្ពុជា និងត្រូវបានកត់ត្រាទុក ក្នុងនោះវេទិកាសេដ្ឋកិច្ច លើកទី១ អាចឈានឆ្ពោះទៅរកលើកទី២ និងទី៣បន្តទៀតបាន អាស្រ័យដោយមានការចូលរួម របស់យុវជន ធុរកិច្ចជនទាំងអស់ ដែលមានវត្តមាននាឱកាសនេះ ដែលនេះជាសកម្មភាពមួយ ជួយគាំទ្រដល់សេដ្ឋកិច្ចជាតិ ។
លោកឡី សុភាព លើកឡើងថា “អ្នកដែលបានចូលរួម វេទិកាសេដ្ឋកិច្ចនាថ្ងៃនេះ គឺជាអ្នកដែលមានបុណ្យខ្ពស់បំផុត សម្រាប់បន្តវេនបម្រើជាតិមាតុភូមិ ។ ជាប្រវត្តិសាស្ត្រ ព្រោះដល់វេទិកា លើកទី២ លើកទី៣ ជារឿងធម្មតា ប៉ុន្តែអ្នកដែលចូលរួមក្នុងថ្ងៃនេះ ចារ្យជាប្រត្តិសាស្ត្រឈ្មោះអ្នកទាំងអស់គ្នា ទៅថ្ងៃខាងមុខ យើងអាចនិយាយបានថា សេដ្ឋកិច្ចរីកចម្រើនបែបនេះ យើងជាចំណែកមួយ នៃការចូលរួមបម្រើជាតិមាតុភូមិ” ។
ឆ្លៀតក្នុងឱកាសនោះ លោកក៏បានលើកឡើង អំពីកត្តា ៤ចំណុចធំៗ ដែលនាំឲ្យសម្រេចបានជោគជ័យ ក្នុងនោះលោកបានលើកឡើងថា “កិច្ចការងារអ្វីក៏ដោយ ការដឹកនាំនៃអង្គភាពនីមួយៗ មិនមែនជារឿងសាមញ្ញនោះទេ រូបមន្តជាក់លាក់ និងកត្តានៃភាពជោគជ័យទី១ គឺការដាក់ផែនការគោលនយោបាយ ឬផែនការសកម្មភាព នៃស្ថាប័ននោះ ទី២ សមាសភាពនៃថ្នាក់ដឹកនាំ គឺជារឿងចាំបាច់សម្រាប់អង្គភាពនីមួយៗ ក្នុងនាមជាមេដឹកនាំមួយរូបៗ ត្រូវស្គាល់ឲ្យច្បាស់ ទាំងច្បាប់ទម្លាប់វិន័យការងារ និងវិន័យផ្ទាល់ខ្លួន ពោលសមាសភាពថ្នាក់ដឹកនាំ ត្រូវសម្រិតសម្រានឲ្យបានល្អ ពីព្រោះមានមនុស្សដើរតាមជាច្រើន ទី៣សមាសភាពក្រុមការងារផ្ទាល់ ដែលត្រូវប្រតិបត្តិនៅថ្នាក់ក្រោមតែម្តង និងចំណុចទី៤ ត្រូវមានការចូលរួមពីគ្រប់ភាគីពាក់ព័ន្ធ ត្រូវមានការសហការ មិនអាចធ្វើអ្វីតែឯងបានទេ” ។
ជាមួយគ្នានោះ លោកបានលើកឡើងទៀតថា “រាជរដ្ឋាភិបាលកម្ពុជា បានរៀបចំនយោបាយចេញពី ការឡោមព័ទ្ធសេដ្ឋកិច្ចតាំងពី៧៩ រហូតមកដល់ឆ្នាំ២០២៣ ធ្វើឲ្យប្រទេសជាតិមានការរីកចម្រើន សម្បូរសម្បាយ ដែលជាអ្វីដែលយើង គួរតែចូលរួមអបអរសាទរ ព្រោះនេះជាសមទ្ធផលជាតិ ជាសមទ្ធផលរបស់យើងទាំងអស់គ្នា” ។
ឆ្លៀតក្នុងឱកាសនេះ លោកសូមកោតសរសើរ ចំពោះការដឹកនាំរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន រយៈពេល៦អាណត្តិនេះ ធ្វើឲ្យប្រទេសជាតិមានការរីកចម្រើន វិវឌ្ឍរហូតស្មើមុខស្មើមាត់ ទាំងក្នុងតំបន់ និងទូទាំងសកលលោក និងសូមអរគុណចំពោះសម្តេចតេជោ ដែលបានដាក់គោលនយោបាយ បើកទូទាយចំពោះវិស័យសេដ្ឋកិច្ចក្រៅប្រព័ន្ធ វិស័យឯកជន ជាក្បាលម៉ាស៊ីនកំណើនសេដ្ឋកិច្ច ។
ជាមួយគ្នានោះ លោកឧកញ៉ាសមូហកបណ្ឌិត ឡី សុភាព បានប្រកាស គាំទ្រនូវគោនយោបាយសេដ្ឋកិច្ច និងសង្គមឌីជីថលកម្ពុជា របស់រាជរដ្ឋាភិបាល ដែលគោលនយោបាយនេះ ផ្តោតលើចក្ខុវិស័យ ការកសាងរដ្ឋាភិបាលឌីជីថល ដើម្បីលើកកម្ពស់គុណភាពជីវិត និងទំនុកចិត្តប្រជាពលរដ្ឋ តាមរយៈការបម្រើសេវាសាធារណៈឲ្យកាន់តែល្អប្រសើរ ។ ក្នុងនោះលោកបានលើកឡើងថា យុវជនសេដ្ឋកិច្ច ដែលជា វិនិយោគិន ពាណិជ្ជករ អាជីវករ ភ្នាក់ងារទីផ្សារ ស្វ័យនិយោជន៏ និងអ្នកជំនាញវិជ្ជាជីវៈ គួរតែជម្រុញការគាំទ្រហិរញ្ញវត្ថុ តាមរយៈយុទ្ធនាការ នៃការរកស៊ីតាមប្រពន្ធធនាគារជាដើម៕
រូបភាព៖ ដើមអម្ពិល/ម៉ៅ ដារាត់
