ប្រធានក្រុមប្រឹក្សា សន្តិសុខជាតិ អ៊ុយក្រែន ៖ សង្គ្រាមលោកលើកទី៣ គឺបានចាប់ផ្តើមរួចទៅហើយ

បរទេស ៖ យោងតាមការចេញ ផ្សាយរបស់ RT ប្រធានក្រុមប្រឹក្សាសន្តិសុខ និង ការពារជាតិអ៊ុយក្រែន កាលពីថ្ងៃម្សិលមិញបានលើកឡើង និងអះអាងថា សង្រ្គាមលោកលើកទី៣គឺកំពុង ដំណើរការស្រាប់ទៅហើយ ដោយជម្លោះរវាងទីក្រុងមូស្គូ និងក្រុងគៀវ បានអូសទាញប្រទេសឆ្ងាយៗ ពីតំបន់ឲ្យមកចូលរួម។

ថ្លែងនៅក្នុងវេទិកាជាតិ ស្តីអំពីសន្តិសុខទីក្រុងគៀវ លោក Aleksey Danilov បានអះអាងថា NATO ត្រូវការអ៊ុយក្រែនជាសមាជិក ព្រោះភាពចលាចលជាសកល នឹងបន្តហើយលោកបានអំពាវនាវ សុំមានការពង្រឹង សម្ព័ន្ធភាពបន្ថែមទៀត។

លោកបន្តថា៖ពីព្រោះថា វាបានចាប់ផ្តើមរួចទៅហើយ ។ ប្រសិនបើនរណាម្នាក់ គិតថា សង្គ្រាមលោកលើកទី៣ មិនទាន់បានចាប់ផ្តើមទេ នោះវាពិតជាកំហុសដ៏ធំមួយ។សង្គ្រាមនេះកំពុងដំណើរការ ក្នុងដំណាក់កាលកូនកាត់មួយរយៈ ហើយឥឡូវនេះបានចូលដល់ ដំណាក់កាលសកម្ម។

គួរឲ្យដឹងដែរថាការលើកឡើង របស់មន្ត្រីជាន់ខ្ពស់អ៊ុយក្រែន រូបនេះ បានធ្វើឡើងក្រោយមួយថ្ងៃ ដែលក្រសួងការពារជាតិ រុស្ស៊ីបានប្រកាសអះអាងថា ក្នុងអំឡុងពេលបីខែ នៃការវាយបក របស់អ៊ុយក្រែនពួកគេបាន បាត់បង់ជីវិតទាហានប្រហែល ៦៦០០០នាក់ និងអាវុធធុនធ្ងន់ចំនួន៧៦០០គ្រឿង ខណៈដែលលទ្ធផល ដែលទទួលបានហាក់ដូចជាមិនមាន អ្វីជាដុំកំភួនឡើយ ៕

ប្រែសម្រួល៖ស៊ុនលី