បរទេស ៖ ក្រសួងការពារជាតិ របស់ប្រទេសរុស្ស៊ី បាននិយាយកាលពីថ្ងៃសៅរ៍ ក្នុងសន្និសីទ ប្រចាំថ្ងៃថា កងកម្លាំងរុស្ស៊ី បានបាញ់ទម្លាក់យន្តហោះចម្បាំង អ៊ុយក្រែន MiG-29 ចំនួនពីរគ្រឿង ក្នុងរយៈពេល ២៤ ម៉ោងក្នុងសប្តាហ៍នេះ នៅក្នុងសន្និសីទ ប្រចាំថ្ងៃរបស់ខ្លួន ។ ទីក្រុងមូស្គូក៏បានអះអាងដែរថា បានបំផ្លាញយន្តហោះគ្មានមនុស្សបើករបស់ទីក្រុងគៀវយ៉ាងហោចណាស់ ១៨ គ្រឿងនៅជួរមុខក្នុងពេលវេលា តែមួយនោះផងដែរ។
យោងតាមសារព័ត៌មាន RT ចេញផ្សាយនៅថ្ងៃទី២៥ ខែវិច្ឆិកា ឆ្នាំ២០២៣ បានឱ្យដឹងដោយផ្អែកតាមយោធារុស្ស៊ីបាននិយាយថា យន្តហោះ MiG-29 ទាំងពីរគ្រឿងបានធ្លាក់នៅតំបន់ Dnepropetrovsk ភាគអាគ្នេយ៍នៃប្រទេសអ៊ុយក្រែន។ យន្តហោះចម្បាំងទាំងពីរគ្រឿងត្រូវបានកំណត់គោលដៅដោយប្រព័ន្ធប្រឆាំងយន្តហោះ ដែលមានមូលដ្ឋានលើដី។
ចំណែកយន្តហោះ គ្មានមនុស្សបើកចំនួន ១៨ គ្រឿងត្រូវបានទម្លាក់នៅតាមបណ្តោយជួរមុខក្នុងអំឡុងពេលដូចគ្នានេះដែរ។ យោធារុស្ស៊ីក៏ បានរាយការណ៍ផងដែរថា ខ្លួនបានបំផ្លាញរ៉ាដា P-18 សម័យសូវៀតចំនួនពីរ ដែលប្រើប្រាស់សម្រាប់ស្វែងរក និងតាមដានគោលដៅពីលើអាកាស។
បន្ថែមពីលើនេះ ទីក្រុងម៉ូស្គូក៏បាននិយាយថា កម្លាំងរបស់ខ្លួនបានកម្ទេចឃ្លាំងគ្រាប់រំសេវចំនួនពីរក្នុងតំបន់។ យោងតាមក្រសួងការពារជាតិបានឱ្យដឹងថា ឃ្លាំងផ្ទុកអាវុធយុទ្ធភណ្ឌ មិនបានបញ្ជាក់ច្បាស់លាស់។
ក្នុងរយៈពេលប៉ុន្មានសប្តាហ៍ថ្មីៗនេះ យោធារុស្ស៊ីទំនងជាបានបង្កើន កិច្ចខិតខំប្រឹងប្រែង របស់ខ្លួនដើម្បីបញ្ចប់នូវសំណល់ដ៏កម្រ នៃកងទ័ពអាកាសអ៊ុយក្រែន ។ កងយន្តហោះដែលនៅសេសសល់ របស់អ៊ុយក្រែន ត្រូវបានគេជឿថាមានភាគច្រើនមានយន្តហោះចម្បាំង Su-27 និង MiG-29 សម័យសូវៀត យន្តហោះទម្លាក់គ្រាប់បែកជួរមុខ Su-24 ក៏ដូចជាយន្តហោះគាំទ្រផ្លូវអាកាសជិត Su-25 មួយចំនួនតូច។
យន្តហោះចម្បាំងត្រូវ បានប្រើប្រាស់ស្ទើរតែទាំងស្រុងដោយទីក្រុងគៀវ សម្រាប់ការវាយប្រហារលើគោលដៅដី រួមទាំងការប្រើប្រាស់អាវុធ ដែលផ្គត់ផ្គង់ដោយលោកខាងលិច ដែលកែប្រែសម្រាប់យន្តហោះ ដែលផលិតដោយសូវៀត ដូចជាមីស៊ីល Storm Shadow ដែលផលិតដោយអង់គ្លេស ឬ SCALP-EG របស់បារាំង ៕
ប្រែសម្រួលៈ ណៃ តុលា
