បរទេស ៖ កសិករក្នុងប្រទេសឥណ្ឌា ដែលបានធ្វើការតវ៉ា នៅជាយក្រុងញូវដេលីអស់រយៈពេលបីថ្ងៃ កន្លងមកនេះ ទាមទារឱ្យមានកំណែទម្រង់ ដើម្បីទទួលបានការធានាតម្លៃ សម្រាប់ផលិតផលរបស់ពួកគេ គឺកំពុងទប់ទល់នឹងយន្តហោះគ្មានមនុស្សបើករបស់ប៉ូលីស ដែលបាញ់ឧស្ម័នបង្ហូរទឹកភ្នែក ដោយប្រើខ្លែងធ្វើដោយដៃ ។
យោងតាមសារព័ត៌មាន RT ចេញផ្សាយកាលពីថ្ងៃទី១៦ ខែកុម្ភៈ ឆ្នាំ២០២៤ បានឱ្យដឹងថា កសិករឥណ្ឌារាប់ពាន់នាក់មកពីរដ្ឋជាច្រើន រួមទាំងរដ្ឋ Punjab, រដ្ឋ Haryana និង រដ្ឋ Uttar Pradesh ក្បែរនោះ គ្រោងនឹងប្រមូលផ្តុំគ្នានៅរដ្ឋធានីរបស់ប្រទេសឥណ្ឌា ដើម្បីចាប់ផ្តើមការតវ៉ាទ្រង់ទ្រាយធំ ប៉ុន្តែត្រូវបានបញ្ឈប់ដោយប៉ូលិស ខណៈដែលរដ្ឋាភិបាលបានដោះស្រាយបិទព្រំដែនរដ្ឋមួយចំនួន។
ចំពេលមានការគៀបសង្កត់ ខ្សែវីដេអូនៃវិធីសាស្រ្តមិនធម្មតារបស់កសិករដែលត្រូវបានគេរាយការណ៍ថា នៅព្រំដែនរវាងរដ្ឋកសិកម្ម Punjab និង រដ្ឋ Haryana បានបង្ហាញនៅលើ X (អតីត Twitter) ។ តាមការរាយការណ៍របស់ប្រព័ន្ធផ្សព្វផ្សាយ អ្នកតវ៉ាមួយចំនួនបានបង្ហោះខ្លែងដើម្បីទម្លាក់យន្តហោះគ្មានមនុស្សបើក ឬ ដ្រូន របស់ប៉ូលីស ខណៈដ្រូនគឺត្រូវបានប៉ូលិសប្រើដើម្បីបញ្ចេញឧស្ម័នបង្ហូរទឹកភ្នែកដើម្បីបំបែកកសិករ។
កាសែត The Hindustan Times បានរាយការណ៍ថា អ្នកផ្សេងទៀតត្រូវបានគេមើលឃើញថា ប្រដាប់ដោយកូនបាល់វាយថេននីស ខណៈដែលពួកគេបន្តធ្វើសង្គ្រាម មិនធម្មតាប្រឆាំងនឹងដ្រូនរបស់ប៉ូលីស។
នៅថ្ងៃដំបូងនៃការតវ៉ា មេដឹកនាំក្រុមកសិករបានបន្ទោសរដ្ឋាភិបាលកណ្តាល របស់ប្រទេសចំពោះការវាយប្រហារលើបាតុករដែលដើរឆ្ពោះទៅក្រុងដេលី។ ពួកគេបានអះអាងថា បាតុករ ៦០ នាក់បានរងរបួសនៅពេលដែលប៉ូលីស បានប្រើគ្រាប់បាញ់ឧស្ម័នបង្ហូរទឹកភ្នែកនៅព្រំដែន Punjab-Haryana នេះបើយោងតាមកាសែត The Times of India ៕
ប្រែសម្រួលៈ ណៃ តុលា
