បរទេស ៖ សមាជិកគណៈរដ្ឋមន្រ្តី ជាច្រើននាក់បាននិយាយថា ពួកគេនឹងមិនអីនោះទេ ប្រសិនបើពួកគេបាត់បង់អាសនៈ ខណៈដែលអ្នកដែលរំពឹងថា នឹងជំនួសតំណែងរដ្ឋមន្ត្រីទាំងនេះ នៅតែមិនមានការប្តេជ្ញាចិត្ត ចំពោះការតែងតាំង ដែលជិតមកដល់របស់ពួកគេ។
យោងតាមសារព័ត៌មាន The Nation ចេញផ្សាយ នៅថ្ងៃទី១៨ ខែមេសា ឆ្នាំ២០២៤ បានឱ្យដឹងថា អ្នកសារព័ត៌មានបាន ចោទសួររដ្ឋមន្ត្រីជាច្រើន ចាប់តាំងពីមានពាក្យ ចចាមអារ៉ាមថា លោកនាយករដ្ឋមន្ត្រី សេដ្ឋា ថាវីស៊ីន គ្រោងនឹងរុះរើគណៈរដ្ឋមន្ត្រី របស់លោកចាប់ផ្តើមធ្វើការជុំគ្នា។
នៅពេលទាក់ទង ជាមួយអ្នកយកព័ត៌មាន មុនកិច្ចប្រជុំគណៈរដ្ឋមន្ត្រីនៅថ្ងៃព្រហស្បតិ៍ រដ្ឋមន្ត្រីសុខាភិបាល សាធារណៈលោក Cholnan Srikaew បាននិយាយថា លោកមិនទាន់ត្រូវបានជូនដំណឹង ជាផ្លូវការអំពីលទ្ធភាព នៃការរុះរើនេះទេ ប៉ុន្តែបានកំពុងតាមដាន របាយការណ៍ប្រព័ន្ធ ផ្សព្វផ្សាយអំពីរឿងនេះ ។
មានការរំពឹងថា លោក Cholnan នឹងស្ថិតក្នុងចំណោមរដ្ឋមន្ត្រីបក្សភឿថៃ មួយចំនួន ដែលត្រូវដកចេញពីគណៈរដ្ឋមន្ត្រី។ លោកថា «វានឹងមិនអីនោះទេ សម្រាប់ខ្ញុំ ប៉ុន្តែខ្ញុំមិនដឹងថា តើសីលធម៌ របស់មន្ត្រីអចិន្ត្រៃយ៍នឹងប៉ះពាល់ឬអត់នោះទេ ។ យ៉ាងណាក៏ដោយ ខ្ញុំបានប្រាប់ពួកគេ ឲ្យបន្តធ្វើការឲ្យបានពេញលេញ ។ ខ្ញុំសូមបញ្ជាក់ថា ខ្ញុំមិនភ័យខ្លាចទេ»។
ចំណែករដ្ឋមន្ត្រីក្រសួងការពារជាតិ លោក Sutin Klungsang ដែលការងារ របស់គាត់ក៏ត្រូវបានគេជឿថា កំពុងស្ថិតនៅលើជួររុះរើនោះ បានដើរឡើងជណ្តើរទៅកាន់ កិច្ចប្រជុំគណៈរដ្ឋមន្ត្រីដោយនិយាយថា លោកនឹងនិយាយទៅកាន់អ្នកសារព័ត៌មាន បន្ទាប់ពីកិច្ចប្រជុំប៉ុណ្ណោះ។
ជាមួយគ្នានេះ អនុរដ្ឋមន្ត្រីក្រសួងកសិកម្ម លោក Chaiya Promma បាននិយាយថា លោកទើបតែបានឮតាមរយៈប្រព័ន្ធផ្សព្វផ្សាយថា ការងាររបស់លោក ស្ថិតនៅលើបន្ទាត់រុះរើ ។ លោកថា “ប៉ុន្តែខ្ញុំមិនមានអារម្មណ៍ បារម្ភអ្វីទាល់តែសោះ។ ខ្ញុំគិតថាខ្ញុំបានធ្វើការ ក្នុងរយៈពេលប្រាំពីរខែកន្លងមកនេះ ក្នុងក្របខណ្ឌនិងការ រឹតបន្តឹងតាមការចាត់តាំង។ ខ្ញុំនឹងមិនជំទាស់នឹងការដកចេញនោះទេ ប្រសិនបើវាស្ថិតនៅក្នុងគោលនយោបាយ របស់មនុស្សជាន់ខ្ពស់របស់គណបក្ស»។
ទោះជាយ៉ាងនេះក្តី លោកបានបន្ថែមថា លោកសង្ឃឹមថា ភឿថៃ នឹងយកក្រសួងកសិកម្មមកវិញ ក្នុងអំឡុងពេលរុះរើ ដូច្នេះវាអាចអនុវត្តគោលនយោបាយ ដើម្បីសុខុមាលភាពរបស់ប្រជាជន ។
រដ្ឋមន្ត្រីក្រសួងវប្បធម៌ លោក Sermsak Pongpanit ដែលរំពឹងថា នឹងប្តូរតំណែងជាមួយរដ្ឋមន្ត្រី ក្រសួងទេសចរណ៍ និងកីឡា Sudawan Wangsuphakijkosol ក៏បានបដិសេធមិនឆ្លើយអ្នកសារព័ត៌មានដែរ ខណៈដែលលោកបានធ្វើដំណើរ ទៅកាន់កិច្ចប្រជុំគណៈរដ្ឋមន្ត្រី។
នៅពេលត្រូវបានស្នើសុំឱ្យធ្វើអត្ថាធិប្បាយ លើការផ្លាស់ប្តូរមុខតំណែង ដែលអាចកើតមាននោះ លោក Sudawan បាននិយាយថា វាគឺជាការសម្រេចចិត្ត របស់នាយករដ្ឋមន្ត្រី ៕
ប្រែសម្រួលៈ ណៃ តុលា
