បរទេស៖ និស្សិតចិនម្នាក់ដែលរៀននៅប្រទេសអូស្ត្រាលី ត្រូវបានជួយសង្គ្រោះ បន្ទាប់ពីក្រុមក្មេងទំនើង បានបោកបញ្ឆោតនាងឱ្យទៅប្រទេសថៃ ហើយបានគំរាមគ្រួសារនាង យកលុយជាងមួយលានដុល្លារថែមទៀត។
យោងតាមសារព័ត៌មាន VN EXPRESS ចេញផ្សាយនៅថ្ងៃទី១៥ ខែឧសភា ឆ្នាំ២០២៤ បានឱ្យដឹងថា ក្រុមបុរសដែលល្បួងនាងទៅប្រទេសថៃ គឺបានទារប្រាក់ចំនួន ៨ លានយន់ (១,១ លានដុល្លារ) ហើយបានគំរាមបញ្ចេញរូប អាសអាភាសរបស់នាង និងលក់សរីរាង្គ (គ្រឿងក្នុង) របស់នាង ប្រសិនបើមិនប្រាក់។
និស្សិតស្រីដែលកំពុងសិក្សា នៅសាកលវិទ្យាល័យជាតិអូស្ត្រាលី គឺបានបាត់ខ្លួនប្រហែលមួយសប្តាហ៍ មុនពេលការជួយសង្គ្រោះ ដូចដែលបានរៀបរាប់លម្អិតនៅក្នុង របាយការណ៍ថ្មីៗនេះដោយកាសែត Southern Metropolis Daily ។
នាងត្រូវបានគេចាត់ទុកថាបាត់ខ្លួន បន្ទាប់ពីខកខានមិនបានចូលរួម ការធ្វើតេស្តប្រឡងពាក់កណ្តាល ឆមាសរបស់នាង ហើយបានអវត្តមានពីអន្តេវាសិកដ្ឋាន របស់នាងចាប់ពីថ្ងៃទី១៥ ខែមេសា។
ម្តាយរបស់នាងនៅក្នុង ប្រទេសចិនបានរាយការណ៍ថា បានទទួលការហៅទូរស័ព្ទកាលពីថ្ងៃទី ១៧ ខែមេសា ពីបុរសម្នាក់ដែលប្រើទូរស័ព្ទកូនស្រី របស់គាត់ដោយទាមទារប្រាក់ ៨លានយ័ន។
បុរសជាជនសង្ស័យ បាននិយាយថា បើមិនបង់លុយទេ គាត់នឹងបង្ខិតបង្ខំក្មេងស្រី ឲ្យបង្ហាញវីដេអូអាសអាភាស ហើយបញ្ជូននាងមកប្រទេសកម្ពុជា ដើម្បីវះយកសរីរាង្គ។
ឪពុកម្តាយរបស់នាងបានរាយការណ៍ ករណីនេះទៅប៉ូលីសចិន។
ជាមួយគ្នានេះ ពួកគេបានរកឃើញមូលនិធិមួយ ដែលពួកគេបានផ្ដល់សម្រាប់ការសិក្សា របស់ក្មេងស្រីនៅប្រទេសអូស្ត្រាលី ត្រូវបានដកម្តងហើយម្តងទៀត និងផ្ទេរទៅឱ្យអ្នកទទួល ដែលមិនស្គាល់នៅក្នុងប្រទេសថៃ ៕
ប្រែសម្រួលៈ ណៃ តុលា
