មនុស្ស ២៥នាក់ត្រូវលង់ទឹកស្លាប់ ខណព្យាយាមឆ្លងទឹកភៀសខ្លួន ពីការប៉ះទង្គិចគ្នា នៅភាគកណ្តាលប្រទេសស៊ូដង់

កាធុម៖ គណៈកម្មាធិការ តស៊ូ ក្នុងតំបន់បានប្រកាសថា មនុស្សយ៉ាងតិច ២៥ នាក់ បានលង់ទឹកស្លាប់ ខណៈដែលកំពុងរ ត់គេច ពីការប៉ះទង្គិចគ្នា ដោយយោធា នៅក្នុងរដ្ឋ Sinnar ភាគកណ្តាលនៃប្រទេសស៊ូដង់ បន្ទាប់ពីទូកឈើរបស់ពួក គេបានក្រឡាប់។

នៅពេលដែល  កងកម្លាំងគាំទ្ររហ័ស RSF បានចូលទៅក្នុងតំបន់នោះ យ៉ាងហោចណាស់មានប្រជាពលរដ្ឋ ២៥នាក់ ដែលភាគច្រើនជាស្ត្រី និងកុមារបានស្លាប់ នៅក្នុងឧបទ្ទវហេតុលិចទូក នៅភាគខាងកើតនៃទីក្រុង Abu Hujar រវាងភូមិ Al-Dibaiba និង Luni”។

មនុស្សជាង ៥៥,៤០០នាក់បានភៀស ខ្លួនចេញពីទីក្រុង Singa ដែលជារដ្ឋធានីនៃរដ្ឋ Sinnar ចាប់តាំងពីការប៉ះទង្គិចគ្នា រវាងកងកម្លាំង ប្រដាប់អាវុធស៊ូដង់ (SAF) និងកងកម្លាំងប្រដាប់អាវុធ RSF បានពង្រីកនៅក្នុងខែមិថុនា នេះបើយោងតាមការិយាល័យអង្គការ សហប្រជាជាតិ សម្រាប់ការសម្របសម្រួល កិច្ចការមនុស្សធម៌ (OCHA) ។

ប្រភពពី OCHA បានរាយការណ៍ថា ជម្លោះស៊ូដង់ ដែលបានផ្ទុះឡើងនៅពាក់កណ្តាលខែមេសា ឆ្នាំ២០២៣ បានបណ្តាលឱ្យមនុស្ស យ៉ាងហោចណាស់ ១៦,៦៥០នាក់បាន ស្លាប់បាត់បង់ជីវិត។

មនុស្សជាង ៧,៧ លាននាក់ត្រូវបានផ្លាស់ទីលំនៅ ខាងក្នុងប្រទេសស៊ូដង់ ចាប់តាំងពីការផ្ទុះឡើងនៃជម្លោះ ខណៈដែលប្រហែល ២,២លាននាក់ផ្សេងទៀត បានឆ្លងព្រំដែនចូលទៅក្នុងប្រទេសជិតខាង នេះបើយោងតាមតួលេខ ដែលចេញផ្សាយនៅថ្ងៃទី២៥ ខែមិថុនា ដោយអង្គការអន្តរជាតិ សម្រាប់ការធ្វើចំណាកស្រុក៕
ប្រែសម្រួល ឈូក បូរ៉ា