បរទេស ៖ យោងតាមការ ចេញផ្សាយរបស់ RT រដ្ឋាភិបាលទីក្រុង ញូវដែលីបានជម្លៀសបុគ្គលិក មិនសំខាន់ទាំងអស់ និងក្រុមគ្រួសារ របស់ពួកគេចេញពីស្ថានទូត និងស្ថានកុងស៊ុល របស់ខ្លួន ក្នុងប្រទេសបង់ក្លាដេស ហើយក្នុងពេល ដែលភាពចលាចលបានផ្ទុះឡើង។
ការសម្រេចចិត្តនេះបានកើតឡើង ក្នុងការឆ្លើយតបនឹងការតវ៉ា ដោយហិង្សា ក្នុងប្រទេសបង់ក្លាដេស ដែលបានបង្ខំនាយករដ្ឋមន្ត្រី Sheikh Hasina ឲ្យចុះចេញពីតំណែង ហើយភៀសខ្លួន ចេញពីប្រទេសភ្លាមៗ ចូលទៅកាន់ប្រទេសឥណ្ឌា។
ទោះយ៉ាងណាក៏ដោយ អ្នកការទូតកំពុងស្នាក់នៅ ក្នុងប្រទេសបង់ក្លាដេស នៅឡើយ ហើយក្រៅពីស្ថានទូត របស់ខ្លួននៅរដ្ឋធានី Dhaka ប្រទេសឥណ្ឌាក៏មានជំនួយការគណៈកម្មការជាន់ខ្ពស់ ឬស្ថានកុងស៊ុលនៅ Chittagong, Rajshahi, Khulna និង Sylhet ផងដែរ ។
គួរឲ្យដឹងដែរថារដ្ឋមន្ត្រីការបរទេសឥណ្ឌាលោក Subrahmanyam Jaishankar បាននិយាយនៅក្នុងសភាកាលពីថ្ងៃពុធថា ជនជាតិឥណ្ឌាប្រហែល១៩,០០០នាក់កំពុងរស់នៅក្នុងប្រទេសបង់ក្លាដេស ដែលក្នុងនោះប្រហែល៩,០០០ជានិស្សិតប៉ុន្តែ ទោះជាយ៉ាងណាក៏ដោយ សិស្សភាគច្រើនបានត្រឡប់ទៅប្រទេសឥណ្ឌាវិញ នៅពេលដែលអំពើហិង្សាចាប់ផ្តើមផ្ទុះឡើង៕
ប្រែសម្រួល៖ស៊ុនលី
