រសៀលថ្ងៃទី២៩ ខែសីហា នៅវិមានសភាប្រជាជនក្រុងប៉េកាំង លោក X i Jinping ប្រធានរដ្ឋចិនបានធ្វើកិច្ចជំនួបជាមួយលោក Jake Sullivan ឧបការីទទួលបន្ទុកកិច្ចការសន្តិសុខជាតិរបស់ប្រធានាធិបតីអាមេរិក។
លោក Xi Jinping បានលើកឡើងថា ប្រឈមមុខនឹងសភាពការណ៍អន្តរជាតិដែលមានភាពច្របូកច្របល់និងស្មុគស្មាញ ប្រទេសនានាត្រូវរួមសាមគ្គីគ្នានិងសហការគ្នា តែមិនត្រូវបំបែកបំបាក់និងប្រឈមដាក់គ្នាទេ។ ប្រជាជនសង្ឃឹមមានការបើកទូលាយនិងរីកចម្រើន តែពុំមែនការបិទខ្ទប់និងដើរថយក្រោយទេ។ ចិននិងអាមេរិកជាប្រទេសធំ ត្រូវទទួលខុសត្រូវចំពោះប្រវត្តិសាស្ត្រ ចំពោះប្រជាជននិងចំពោះពិភពលោក ហើយធ្វើជាអ្នកជំរុញស្ថិរភាពនិងការអភិវឌ្ឍរួមនៃពិភពលោក។
លោក Xi Jinping បានបន្តថា ទោះបីជាស្ថានការណ៍ក្នុងប្រទេសទាំងពីរចិននិងអាមេរិក និងទំនាក់ទំនងរវាងចិននិងអាមេរិកកើតមានការប្រែប្រួលយ៉ាងខ្លាំងក្តី ប៉ុន្តែ គោលដៅរបស់ចិនដែលខិតខំរក្សាឱ្យទំនាក់ទំនងចិន-អាមេរិកអភិវឌ្ឍន៍ប្រកបដោយស្ថិរភាព ល្អប្រសើរ និងនិរន្តរភាពគឺមិនដែលកែប្រែទេ , គោលការណ៍សម្រាប់ដោះស្រាយទំនាក់ទំនងចិន-អាមេរិកដោយឈរលើការគោរពគ្នា រួមរស់ដោយសន្តិសហវិជ្ជមាន និងធ្វើកិច្ចសហប្រតិបត្តិការឈ្នះ-ឈ្នះ គឺមិនដែលកែប្រែទេ, គោលជំហរដែលគាំពារអធិបតេយ្យភាពទឹកដី សន្តិសុខជាតិ និងផលប្រយោជន៍អភិវឌ្ឍន៍ជាតិគឺមិនដែលកែប្រែទេ, ការខិតខំដើម្បីបន្តរឹតបន្តឹងចំណងមិត្តប្រពៃណីរវាងប្រជាជនចិន និងអាមេរិកក៏មិនដែលកែប្រែដែរ។ សង្ឃឹមថា ភាគីអាមេរិកនឹងបោះជំហានទៅកាន់ទិសដៅដូចគ្នាជាមួយចិន យល់ដឹងពីការអភិវឌ្ឍរបស់ចិនដោយអាកប្បកិរិយាវិជ្ជមាន និងសត្យានុម័ត ចាត់ទុកការអភិវឌ្ឍរវាងគ្នានឹងគ្នាជាឱកាសតែពុំមែនជាបញ្ហាប្រឈម ហើយរួមជាមួយភាគីចិនស្វែងរកមធ្យោបាយដ៏ត្រឹមត្រូវសម្រាប់ការរួមរស់ជាមួយគ្នារវាងប្រទេសធំទាំងពីរ៕
