ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានឲ្យដឹងថា ប្រធានាធិបតីរុស្ស៊ី លោក វ្លាឌីមៀ ពូទីន និងស្ថាបនិក Telegram លោក Pavel Durov មិនដែលជួបប្រជុំគ្នាម្ដងណាឡើយ។
នៅថ្ងៃទី២៤ ខែសីហា លោក Durov ដែលជាស្ថាបនិកក្រុមហ៊ុន Telegram ដើមកំណើតរុស្ស៊ី ត្រូវបានចាប់ខ្លួននៅអាកាសយានដ្ឋានទីក្រុងប៉ារីស ប្រទេសបារាំង ក្រោមការចោទប្រកាន់ពាក់ព័ន្ធនឹងការប្រើប្រាស់កម្មវិធីផ្ញើសាររបស់លោក រួមទាំងអំពើភេរវកម្ម រូបភាពអាសអាភាសលើកុមារ ការជួញដូរគ្រឿងញៀន ការលាងលុយកខ្វក់ និងការក្លែងបន្លំជាដើម។
មហាសេដ្ឋីវ័យ ៣៩ឆ្នាំរូបនេះមានសញ្ជាតិនៃប្រទេសជាច្រើនរួមទាំងប្រទេសបារាំងផងដែរ។ កាលពីថ្ងៃពុធ លោក Durov ត្រូវបានដោះលែងក្រោមការត្រួតពិនិត្យរបស់តុលាការ ប៉ុន្ដែបានហាមមិនឲ្យលោកចាកចេញពីប្រទេសបារាំង និងបានបង្គាប់ឲ្យបង់ប្រាក់ធានាចំនួន ៥លានអឺរ៉ូ (៥,៥ លានដុល្លារ)។
លោក Peskov ក៏បានបដិសេធមិនធ្វើអត្ថាធិប្បាយលើការឃុំខ្លួនពលរដ្ឋកូឡុំប៊ីពីរនាក់នៅក្នុងប្រទេសរុស្ស៊ីផងដែរ ដោយបង្វែរសំណួរទៅនាយកដ្ឋានពាក់ព័ន្ធ។
លោក Peskov បានប្រាប់អ្នកយកព័ត៌មានថា “ខ្ញុំមិនមានព័ត៌មានអ្វីទាំងអស់អំពីការឃុំឃាំងពលរដ្ឋកូឡុំប៊ីនោះទេ។ ខ្ញុំស្នើឱ្យអ្នកទាក់ទងសេវាកម្មពាក់ព័ន្ធ – ក្រសួងកិច្ចការផ្ទៃក្នុង ឬ FSB ។ នេះមិនមែនជាប្រធានបទសម្រាប់រដ្ឋបាលប្រធានាធិបតីនោះ” ។
គួរបញ្ជាក់ថា នៅព្រឹកថ្ងៃដដែល សេវាសន្តិសុខសហព័ន្ធរុស្ស៊ី (FSB) បានឲ្យដឹងថា ខ្លួនបានឃុំខ្លួនពលរដ្ឋកូឡុំប៊ីពីរនាក់ដែលសង្ស័យថា បានចូលរួមក្នុងប្រតិបត្តិការយោធាជាមួយភាគីអ៊ុយក្រែនក្នុងនាមជាទាហានស៊ីឈ្នួល៕
ប្រែសម្រួល ឈូក បូរ៉ា
