ហ្គាហ្សា៖ អាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សាបានឧ្យដឹងថា យ៉ាងហោចណាស់ជនជាតិប៉ាឡេស្ទីន ២២ នាក់បានស្លាប់ និង ៣០នាក់ ផ្សេងទៀតបានរងរបួសនៅថ្ងៃសៅរ៍នេះ នៅក្នុងការវាយប្រហារតាមអាកាសរបស់អ៊ីស្រាអែល ទៅលើលំនៅដ្ឋានសាលារៀនមួយកន្លែង ដែលបានផ្លាស់ទីលំនៅប្រជាជននៅភាគខាងត្បូងទីក្រុងហ្គាហ្សា។
អាជ្ញាធរសុខាភិបាលបានឧ្យដឹងនៅក្នុងសេចក្តីថ្លែងការណ៍ខ្លីមួយថា សាលារៀននេះស្ថិតនៅក្នុងសង្កាត់ Zeitoun ហើយអ្នកស្លាប់បាត់បង់ជីវិតភាគច្រើនជាកុមារ និងស្ត្រី។
ប្រភពសន្តិសុខប៉ាឡេស្ទីនបានប្រាប់ស៊ិនហួ ថា យន្តហោះចម្បាំងអ៊ីស្រាអែលមួយគ្រឿងបានទម្លាក់គ្រាប់បែកលើសាលារៀនដោយមីស៊ីលមួយគ្រាប់ បណ្ដាលឧ្យមានអ្នកស្លាប់និងរបួសច្រើនបែបនេះ។
នៅក្នុងសេចក្តីថ្លែងការណ៍មួយ ការិយាល័យប្រព័ន្ធផ្សព្វផ្សាយរបស់រដ្ឋាភិបាលដែលគ្រប់គ្រងដោយក្រុមហាម៉ាស់ នៅតំបន់ហ្គាហ្សាបានចោទប្រកាន់កងទ័ពអ៊ីស្រាអែលថាបានប្រព្រឹត្ត “ការសម្លាប់រង្គាល។
សេចក្តីថ្លែងការណ៍នេះបានធ្វើឱ្យកងទ័ពអ៊ីស្រាអែល និងរដ្ឋបាលសហរដ្ឋអាមេរិក ទទួលខុសត្រូវទាំងស្រុង ចំពោះការបន្តនៃឧក្រិដ្ឋកម្មនេះ ហើយបានអំពាវនាវឱ្យសហគមន៍អន្តរជាតិបង្ខំអ៊ីស្រាអែលឱ្យបញ្ឈប់ឧក្រិដ្ឋកម្មរបស់ខ្លួន៕
ប្រែសម្រួល ឈូក បូរ៉ា
