លោក ដូណាល់ ត្រាំ ប្រធានាធិបតី ទើបជាប់ឆ្នោតរបស់អាមេរិក ប្តេជ្ញាថា មិនឱ្យមានសមាជិកគ្រួសារនៅក្នុងរដ្ឋាភិបាល

បរទេស៖ ប្រធានាធិបតី ជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បាននិយាយថា លោកមិនចង់ឱ្យកូនៗ របស់លោកចូលបម្រើ ក្នុងរដ្ឋបាលថ្មីនោះទេ។

យោងតាមសារព័ត៌មាន RT ចេញផ្សាយនៅថ្ងៃទី៦ ខែវិច្ឆិកា ឆ្នាំ២០២៤ បានឱ្យដឹងថា លោក ដូណាល់ ត្រាំ បានធ្វើការកត់សម្គាល់បែបនេះកាលពីថ្ងៃពុធក្នុងអំឡុងពេលបទសម្ភាសន៍ជាមួយសារព័ត៌មាន Fox News បន្ទាប់ពីជ័យជម្នះការបោះឆ្នោតរបស់លោកលើគូប្រជែងប្រជាធិបតេយ្យគឺលោកស្រី Kamala Harris ។

លោក ដូណាល់ ត្រាំ បានធ្វើជាប្រធានាធិបតីទី ៤៥ របស់សហរដ្ឋអាមេរិកពីឆ្នាំ ២០១៧ ដល់ឆ្នាំ ២០២១ ហើយនឹងធ្វើជាប្រធានាធិបតីទី៤៧ ចាប់ពីឆ្នាំ ២០២៥ ។ កូនស្រីច្បងរបស់លោកគឺ លោកស្រី Ivanka Trump និងកូនប្រសារ Jared Kushner គឺជាទីប្រឹក្សាដ៏សំខាន់របស់គាត់ក្នុងអំឡុងពេលអាណត្តិដំបូងរបស់គាត់ ជាញឹកញាប់បានទាញការរិះគន់ចំពោះតួនាទីរបស់ពួកគេ។ នៅឆ្នាំ២០២២ នៅពេលដែលលោក ដូណាល់ ត្រាំ បានចាប់ផ្តើមការប្រណាំង ប្រជែងទីបីសម្រាប់សេតវិមាន , Ivanka បានប្រកាសថា នាងនឹងលាឈប់ពី នយោបាយដើម្បីផ្តល់អាទិភាពដល់កូន ៗ និងជីវិតគ្រួសាររបស់នាង។

Ivanka Trump បាននិយាយនៅពេលនោះថា៖ «ខណៈដែលខ្ញុំនឹងស្រឡាញ់និងគាំទ្រឪពុកខ្ញុំទៅមុខ ខ្ញុំនឹងធ្វើដូច្នេះនៅក្រៅឆាកនយោបាយ»។

ការសម្រេចចិត្ត របស់នាងបានកើតឡើង នៅពេលដែល លោក ដូណាល់ ត្រាំ ប្រឈមមុខនឹងការ ចោទប្រកាន់ ផ្នែកព្រហ្មទណ្ឌ សហព័ន្ធជាច្រើន ដែលទាក់ទងនឹងការទាញយកឯកសារដែលបានចាត់ថ្នាក់ (ឯកសារសម្ងាត់) ជាង ១០០ ដែលបានរកឃើញពីអចលនទ្រព្យ Mar-a-Lago របស់គាត់នៅ Palm Beach រដ្ឋ Florida ។ Ivanka រួមជាមួយបងប្អូន ប្រុសរបស់នាងគឺ Eric និង Donald Jr. ក៏ត្រូវបានគេដាក់ឈ្មោះ នៅក្នុងបណ្តឹងរដ្ឋប្បវេណី របស់អគ្គមេធាវីញូវយ៉កផងដែរ ហើយប្រឈមមុខ នឹងហានិភ័យផ្នែកច្បាប់ជាផ្នែក នៃអាជីវកម្មគ្រួសារ ៕
ប្រែសម្រួលៈ ណៃ តុលា