បរទេស៖ យោងតាមមជ្ឈមណ្ឌល ស្រាវជ្រាវថាមពល និងខ្យល់ស្អាត (CREA) បានឱ្យដឹងថា ការនាំចេញផលិតផលប្រេងរបស់ប្រទេសឥណ្ឌាទៅកាន់សហភាពអឺរ៉ុបបានកើនឡើង ៥៨ភាគរយ នៅក្នុងត្រីមាសទី ១ នៃឆ្នាំនេះ ដែលនេះបង្ហាញពីការកើនឡើងនៃការទិញប្រេងឥន្ធនៈដែលផលិតពីប្រេងឆៅរុស្ស៊ីដែលត្រូវបានដាក់ទណ្ឌកម្ម។
យោងតាមសារព័ត៌មាន RT ចេញផ្សាយនៅថ្ងៃទី១១ ខែវិច្ឆិកា ឆ្នាំ២០២៤ បានឱ្យដឹងថា ឧស្សាហកម្មចម្រាញ់ប្រេងឈានមុខគេរបស់ឥណ្ឌាកំពុងពឹងផ្អែកកាន់តែខ្លាំងឡើងលើប្រេងឆៅពីរុស្ស៊ី ហើយប្រទេសនេះគឺជាអ្នកទិញធំជាងគេទីពីរនៃឥន្ធនៈហ្វូស៊ីលរបស់រុស្ស៊ីនៅក្នុងខែតុលា, នេះបើតាមទីភ្នាក់ងារខាងថាមពលបានសរសេរនៅក្នុងរបាយការណ៍មួយកាលពីថ្ងៃសុក្រ។ CREA បានកត់សម្គាល់ថា ការប៉ាន់ប្រមាណ ៧៧ភាគរយ នៃការនាំចូលរបស់ឥណ្ឌាពីប្រទេសរុស្ស៊ីដែលមានតម្លៃ ២ ពាន់លានដុល្លារ រួមមានប្រេងឆៅ។
បន្ទាប់ពីការកើនឡើង នៃជម្លោះអ៊ុយក្រែនក្នុងឆ្នាំ ២០២២ បណ្តាប្រទេស EU និង G7 បានដាក់ចេញនូវការកំណត់តម្លៃ និងការហ៊ុមព័ទ្ធលើការនាំចូលប្រេងឆៅ និងផលិតផលប្រេងចម្រាញ់ ពីប្រទេសរុស្ស៊ី ក្នុងគោលបំណងរារាំងលំហូរនៃប្រាក់ចំណូលទៅកាន់ទីក្រុងម៉ូស្គូ។
CREA ពន្យល់ថា ទោះជាយ៉ាងណាក៏ដោយ កង្វះបទប្បញ្ញត្តិរបស់សហភាពអឺរ៉ុបស្តីពីគីមីឥន្ធនៈដែលផលិតពីប្រេងឆៅរុស្ស៊ីនៅក្នុងប្រទេសទីបី បានន័យថា ឥណ្ឌាអាចនាំចូលប្រេងឆៅពីរុស្ស៊ី ចម្រាញ់ និងនាំចេញផលិតផលប្រេងស្របច្បាប់ទៅសហភាពអឺរ៉ុប។
បន្ទាប់ពីការដាក់ទណ្ឌកម្ម ទីក្រុងញូវដែលីបានបង្កើនការទិញប្រេងពីរុស្សី ដោយលក់ក្នុងតម្លៃបញ្ចុះតម្លៃយ៉ាងសន្ធឹកសន្ធាប់។ ថ្នាក់ដឹកនាំឥណ្ឌាបានអះអាងថា ប្រទេសឥណ្ឌាកំពុងបន្តអនុវត្តគោលនយោបាយថាមពលជាក់ស្តែង និងផ្តល់អាទិភាពដល់លទ្ធភាពសមរម្យសម្រាប់ពលរដ្ឋរបស់ខ្លួន។
ឥណ្ឌាជាប្រទេសដែលមានប្រជាជនច្រើនជាងគេក្នុងពិភពលោក និងជាប្រទេសប្រើប្រាស់ប្រេងធំជាងគេទីបី។ នៅក្នុងកិច្ចប្រជុំកំពូលធុរកិច្ចរុស្ស៊ី-ឥណ្ឌានៅទីក្រុងបុមបៃកាលពីថ្ងៃចន្ទ រដ្ឋមន្ត្រីការបរទេសឥណ្ឌាលោក Subrahmanyam Jaishankar បានរំលឹកឡើងវិញថា ទីក្រុងញូវដែលីចង់កសាងកិច្ចសហប្រតិបត្តិការថាមពលរយៈពេលវែងជាមួយរុស្ស៊ី ដែលអាចឱ្យប្រទេសទាំងពីរ ទប់ទល់នឹងភាពមិនប្រាកដប្រជាជាសកលបាន៕
ប្រែសម្រួលៈ ណៃ តុលា
