បរទេស៖ ប្រទេសចិនកំពុងបង្កើនកិច្ចខិតខំប្រឹងប្រែងដើម្បីធ្វើឱ្យទំនាក់ទំនងរលូនជាមួយសហភាពអឺរ៉ុប បន្ទាប់ពីការបោះឆ្នោតនៅសហរដ្ឋអាមេរិក ដោយមន្ត្រីកំពូលរបស់ចិន និងប្រព័ន្ធផ្សព្វផ្សាយរដ្ឋបានរក្សាថា ទំនាក់ទំនងដែលប្រសើរឡើងគឺស្ថិតនៅក្នុងចំណាប់អារម្មណ៍របស់ទីក្រុងព្រុចសែល និងទីក្រុងប៉េកាំង។
យោងតាមសារព័ត៌មាន VOA ចេញផ្សាយនៅថ្ងៃទី១៤ ខែវិច្ឆិកា ឆ្នាំ២០២៤ បានឱ្យដឹងថា ខណៈដែលប្រទេសនានាជុំវិញពិភពលោកព្យាយាមទន្ទឹងរង់ចាំថាតើជ័យជម្នះរបស់ប្រធានាធិបតីជាប់ឆ្នោត Donald Trump អាចមានន័យយ៉ាងណាចំពោះគោលនយោបាយការបរទេសរបស់សហរដ្ឋអាមេរិក អ្នកវិភាគបាននិយាយថា ការជំរុញដោយទីក្រុងប៉េកាំងហាក់ដូចជាជំរុញឱ្យមានជម្លោះរវាងសហភាពអឺរ៉ុប និងសហរដ្ឋអាមេរិក។
លោកស្រី Alicja Bachulska អ្នកជំនាញខាងគោលនយោបាយការបរទេសចិននៅក្រុមប្រឹក្សាអឺរ៉ុបស្តីពីទំនាក់ទំនងការបរទេស បាននិយាយថា “ទីក្រុងប៉េកាំងកំពុងព្យាយាមទាញយកភាពមិនច្បាស់លាស់នាពេលបច្ចុប្បន្នទាក់ទងនឹងអនាគតនៃទំនាក់ទំនងឆ្លងមហាសមុទ្រអាត្លង់ទិក ដើម្បីធានាថា EU ឃ្លាតឆ្ងាយពីវិធីសាស្រ្តប្រឈមមុខគ្នាកាន់តែខ្លាំងឡើងរបស់ទីក្រុងវ៉ាស៊ីនតោនចំពោះប្រទេសចិន ប៉ុន្តែវានឹងពិបាកសម្រាប់ [សម្រាប់ទីក្រុងប៉េកាំង] ដើម្បីសម្រេចកិច្ចការនេះ” ។
លោកស្រីបានប្រាប់ VOA ក្នុងការឆ្លើយតបជាលាយលក្ខណ៍អក្សរថា “អឺរ៉ុបបានដឹងកាន់តែខ្លាំងឡើងអំពីផលប៉ះពាល់អវិជ្ជមាននៃគោលនយោបាយការបរទេស និងឧស្សាហកម្មរបស់ចិនលើទីផ្សារតែមួយ និងសន្តិសុខនៃផ្នែកខាងកើតរបស់អង្គការណាតូ”។
កាលពីថ្ងៃទី៩ ខែវិច្ឆិកា អនុប្រធានកិច្ចការអឺរ៉ុបនៅក្រសួងការបរទេសចិន លោក Cao Lei បាននិយាយថា ដោយសារតែជ័យជម្នះរបស់លោក Trump អាចជា “ចំណុចរបត់នៃសម័យកាលរបស់យើង” សហភាពអឺរ៉ុប និងចិនគួរតែជួសជុលការបែកបាក់ និងកែលម្អទំនាក់ទំនងទ្វេភាគី៕
ប្រែសម្រួលៈ ណៃ តុលា
