ខេត្តកំពង់ធំ: ក្មេងប្រុសម្នាក់បានស្លាប់យ៉ាងអាណោចអាធម ខណៈឪពុកម្តាយកំពុងអង្គុយហូបបាយត្រូវបានគ្រែបាក់សង្កត់។ ហេតុការណ៍នេះនៅម៉ោងប្រមាណ១២ និង៣០នាទីថ្ងៃត្រង់ទី១៦ ខែវិច្ឆិកា ឆ្នាំ២០២៤ នៅចំណុចផ្ទះជនរងគ្រោះស្ថិតក្នុងភូមិស្លែង ឃុំក្តីដូង ស្រុកកំពង់ស្វាយ ខេត្តកំពង់ធំ។
ប្រភពពីសមត្ថកិច្ចឲ្យដឹងថា សពជនរងគ្រោះឈ្មោះ ធា ដាវីត ភេទប្រុស អាយុ១ឆ្នាំ៨ខែ រស់នៅក្នុងភូមិ/ឃុំ កើតហេតុខាងលើ។ មុនកើតហេតុជនរងគ្រោះបានចុះលេងក្រោមគ្រែ ពេលឪពុកម្តាយ កំពុងអង្គុយហូបបាយនៅលើគ្រែ ហើយបានបាក់គ្រែសង្កត់លើកូនដោយពុំដឹងកូននៅក្រោមគ្រែ បណ្តាលឲ្យស្លាប់តែម្ដង។
គួររំលេចថាកណីដូចនេះកើតមានឡើងដោយកម្រ ដូច្នេះសូមឪពុកម្តាយគ្រប់រូប ត្រូវបន្ថែមការយកចិត្តទុកដាក់ មើលថែទាំកូនតូចៗឲ្យបានល្អ កុំឲ្យឆ្ងាយពីក្រសែភ្នែក ព្រោះវ័យកូនតូចៗជាទីស្រឡាញ់ពេញរពឹសខ្លាំង កុំឲ្យកើតមានឡើងនូវរឿងអកុសលដូចពេលនេះ៕
ដោយ៖ សំនៀង
