តូក្យូ៖ រដ្ឋាភិបាលជប៉ុនបានឲ្យដឹងថា ខ្លួនកំពុងពិចារណាកាត់បន្ថយ ការបំភាយឧស្ម័នផ្ទះកញ្ចក់ចំនួន ៦០ ភាគរយនៅឆ្នាំសារពើពន្ធ ២០៣៥ បើធៀបនឹង កម្រិតសារពើពន្ធឆ្នាំ២០១៣ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ក្យូដូជប៉ុន ។
ក្រសួងបរិស្ថាន និងក្រសួងសេដ្ឋកិច្ច ពាណិជ្ជកម្ម និង ឧស្សាហកម្មបានស្នើឡើងនូវគោលដៅថ្មី កើនឡើង ១៤ ភាគរយពីគោលដៅបច្ចុប្បន្ន នៅក្នុងកិច្ចប្រជុំរួមមួយ ដោយថា ការកាត់បន្ថយយ៉ាង ខ្លាំងក្លាគឺចាំបាច់ ដើម្បីសម្រេចបាន នូវការបំភាយឧស្ម័នសូន្យសុទ្ធនៅឆ្នាំ២០៥០ ។
ដោយសារក្រុមអាកាសធាតុរបស់អង្គការសហប្រជាជាតិបានស្នើឱ្យប្រទេសនីមួយៗដាក់ទិសដៅកាត់បន្ថយការបំភាយឧស្ម័នថ្មីរបស់ខ្លួនសម្រាប់ឆ្នាំ២០៣៥ ត្រឹមខែកុម្ភៈ រដ្ឋាភិបាល គ្រោងនឹងបញ្ចូលគោលដៅជាលេខនៅក្នុងសេចក្តីព្រាងផែនការ សម្រាប់វិធានការទប់ទល់នឹងការឡើងកំដៅផែនដី ដែលរំពឹងថា នឹងចងក្រងនៅចុងឆ្នាំនេះ។ ផែនការនេះនឹងត្រូវរៀបចំឡើង ដោយសហការជាមួយ គណបក្សកាន់អំណាច ព្រមទាំងក្រសួងស្ថាប័នពាក់ព័ន្ធ។
ក្នុងអំឡុងពេល នៃកិច្ចប្រជុំនេះ អ្នកចូលរួមមួយ ចំនួនបាននិយាយថា ប្រទេសត្រូវកំណត់គោលដៅ ដែលមានមហិច្ឆ តាបន្ថែមទៀត ខណៈដែលអ្នកផ្សេងទៀតបានគាំទ្រគោលដៅ ដែលបានស្នើឡើង ពោលគឺកាត់បន្ថយ ៦០ ភាគរយនៅឆ្នាំសារពើពន្ធ ២០៣៥ និងកាត់បន្ថយ ៧៣ ភាគរយ នៅឆ្នាំសារពើពន្ធឆ្នាំ២០៤០។
បច្ចុប្បន្ននេះ ប្រទេសជប៉ុនមានបំណងកាត់បន្ថយ ការបញ្ចេញឧស្ម័នផ្ទះកញ្ចក់ចំនួន ៤៦ ភាគរយនៅឆ្នាំសារពើពន្ធ ២០៣០ បើធៀបនឹងកម្រិតសារពើពន្ធឆ្នាំ២០១៣ ។ ក្រុមប្រឹក្សាអន្តររដ្ឋាភិបាលស្តីពីការ ប្រែប្រួលអាកាស ធាតុបានវាយតម្លៃថា ការបំភាយឧស្ម័នផ្ទះកញ្ចក់ ជាសកលត្រូវតែកាត់បន្ថយចំនួន ៦០ ភាគរយនៅឆ្នាំ ២០៣៥ បើប្រៀបធៀបទៅ នឹងកម្រិតឆ្នាំ២០១៩ ដើម្បីកំណត់ការឡើងកំដៅដល់ ១,៥អង្សាសេ បើប្រៀបធៀបទៅនឹងកម្រិតមុនឧស្សាហកម្ម៕
ប្រែសម្រួល ឈូក បូរ៉ា
