បរទេស ៖ យោងតាមការចេញផ្សាយរបស់ RT នាយកប្រតិបត្តិក្រុមហ៊ុន Meta លោក Mark Zuckerberg បានទទួលទានអាហារ ពេលល្ងាចជាមួយប្រធានាធិបតី ជាប់ឆ្នោតរបស់សហរដ្ឋអាមេរិក Donald Trump នៅឯអគារ Mar-a-Lago របស់លោក Trump ។
ប្រភពព័ត៌មានជាច្រើនបានសរសេរថាលោក Zuckerberg ដែលគ្រប់គ្រង Facebook, WhatsApp និង Instagram បានបង្ហាញវត្តមាននៅឯរមណីយដ្ឋានក្នុងទីក្រុង Florida របស់លោក Trump ដែលជាទីស្នាក់ការកណ្តាល នៃរដ្ឋបាលដែលត្រៀម ចូលកាន់តំណែងនៅពេលបច្ចុប្បន្ន។
អ្នកនាំពាក្យក្រុមហ៊ុន Meta បានទទួលស្គាល់ថាលោក Zuckerberg និងប្រធានាធិបតីជាប់ឆ្នោតបានទទួលទានអាហារពេលល្ងាចជាមួយគ្នាកាលពីថ្ងៃពុធ។
Meta បាននិយាយនៅក្នុងសេចក្តីថ្លែងការណ៍មួយថា៖លោក Mark បានថ្លែងអំណរគុណ ចំពោះការអញ្ជើញឱ្យចូលរួមជាមួយប្រធានាធិបតី Trump សម្រាប់អាហារពេលល្ងាច និងឱកាសដើម្បីជួបជាមួយសមាជិក នៃក្រុមរបស់គាត់អំពីរដ្ឋបាល ដែលនឹងចូលមកកាន់តំណែងនោះផងដែរ ។ វាជាពេលវេលាដ៏សំខាន់ សម្រាប់អនាគតនៃការច្នៃប្រឌិតរបស់អាមេរិក។
ដោយដកស្រង់ប្រភពអនាមិក កាសែត New York Times បាននិយាយថា កិច្ចប្រជុំនេះត្រូវបានផ្តួចផ្តើមឡើង ដោយលោក Zuckerberg ដែលជាក់ស្តែងបានដើរថយក្រោយ ចំពោះការផ្លាស់ប្តូរពីមុន របស់គាត់ដើម្បីត្រួតពិនិត្យ Trump និងផ្តល់មូលនិធិដល់គណបក្ស ប្រជាធិបតេយ្យ នៅឆ្នាំ២០២០ប៉ុន្តែយ៉ាងណាក្តី ប្រធានបទពិតប្រាកដ នៃការសន្ទនាអាហារពេលល្ងាច របស់ពួកគេមិនត្រូវបានបង្ហាញឱ្យដឹងនោះទេ ៕
ប្រែសម្រួល៖ស៊ុនលី
