បរទេស ៖ យោងតាមការ ចេញផ្សាយរបស់ RT នាយករដ្ឋមន្ត្រីអ៊ុយក្រែនលោក Denis Shmigal បានប្រកាសកាលពីថ្ងៃអង្គារថា ការដំឡើងប្រាក់ដំបូង ចំនួន១ពាន់លានដុល្លារ នៃប្រាក់កម្ចីចំនួន២០ពាន់លានដុល្លារ អាមេរិក ដែលគាំទ្រដោយទ្រព្យសម្បត្តិ របស់រុស្ស៊ីដែលត្រូវបានដកហូតត្រូវ បានបង់ទៅឱ្យទីក្រុងគៀវហើយខណៈដែល រុស្ស៊ីបានប្តេជ្ញាថានឹងឆ្លើយតបនឹងអ្វីដែលហៅថាជាការលួចនេះ ។
ការផ្ទេរលុយនេះកើតឡើង ពីរសប្តាហ៍បន្ទាប់ពីរតនាគារ សហរដ្ឋអាមេរិកបានប្រកាសបង់ប្រាក់ ចំនួន២០ពាន់លានដុល្លារ ទៅក្នុងមូលនិធិរបស់ធនាគារពិភពលោក សម្រាប់ការផ្ទេរទៅអ៊ុយក្រែន ។
សហភាពអឺរ៉ុបបានសន្យាផ្តល់វិភាគទានបន្ថែម ចំនួន២០ពាន់លានដុល្លារ ដល់មូលនិធិ ខណៈដែលសមាជិក G7 អង់គ្លេស ជប៉ុន និងកាណាដានឹងបន្ថែម១០ពាន់លានដុល្លារ ទៀត សម្រាប់សរុបចំនួន៥០ពាន់លានដុល្លារដែលតាមទ្រឹស្តី នឹងត្រូវសងក្នុងរយៈពេល៤០ឆ្នាំ។
ប្រាក់កម្ចីនេះត្រូវបានផ្តល់ហិរញ្ញប្បទាន ដោយការប្រាក់ដែលទទួលបានពីទ្រព្យសម្បត្តិ អធិបតេយ្យភាពរបស់រុស្ស៊ីដែលជាប់គាំង។ ទឹកប្រាក់ប្រមាណ៣០០ពាន់លានដុល្លារ ជាកម្មសិទ្ធិរបស់ធនាគារកណ្តាលរុស្ស៊ី ត្រូវបានបង្កកដោយសហរដ្ឋអាមេរិក និងសម្ព័ន្ធមិត្ត របស់ខ្លួន បន្ទាប់ពីការកើនឡើងនៃជម្លោះអ៊ុយក្រែនក្នុងខែកុម្ភៈ ឆ្នាំ២០២២។
នៅក្នុងសេចក្តីប្រកាសដាច់ដោយឡែកមួយកាលពីថ្ងៃអង្គារ លោក Shmigal បាននិយាយថា អ៊ុយក្រែនក៏ទទួលបាន១ ពាន់លានដុល្លារពីប្រទេសជប៉ុន និងចក្រភពអង់គ្លេសផងដែរ តាមរយៈកម្មវិធីរបស់ធនាគារពិភពលោកដូចគ្នា៕
ប្រែសម្រួល៖ស៊ុនលី
