គៀវ៖ ក្រសួងហិរញ្ញវត្ថុរបស់ប្រទេសអ៊ុយក្រែន បានប្រកាសថា ខ្លួនបានទទួលប្រាក់ចំនួន ៣ ពាន់លានអឺរ៉ូ (ប្រហែល ៣,០៩ពាន់លានដុល្លារអាមេរិក) ពីសហភាពអឺរ៉ុប ដែលគាំទ្រដោយប្រាក់ចំណូល នៃទ្រព្យសម្បត្តិរបស់រុស្ស៊ី ដែលត្រូវបានបង្កក។
មូលនិធិនេះ គឺជាផ្នែកមួយនៃការរួមចំណែក របស់សហភាពអឺរ៉ុបចំពោះគំនិត ផ្តួចផ្តើមការពន្លឿនប្រាក់ចំណូលវិសាមញ្ញ សម្រាប់ក្រុមទាំងប្រាំពីរ (G7) សម្រាប់អ៊ុយក្រែន (ERA) នេះបើយោងតាមសេចក្តីថ្លែងការណ៍ នៅលើគេហទំព័ររបស់ក្រសួង។
រដ្ឋមន្ត្រីហិរញ្ញវត្ថុលោក Sergii Marchenko បានឲ្យដឹងថា ប្រាក់នេះនឹងត្រូវបានប្រើ ដើម្បីផ្តល់ហិរញ្ញប្បទានដល់ការចំណាយថវិកា ជាអាទិភាពក្នុងវិស័យសង្គម និងយោធា គាំទ្រស្ថិរភាពម៉ាក្រូសេដ្ឋកិច្ច និងស្តារហេដ្ឋារចនាសម្ព័ន្ធសំខាន់ៗឡើងវិញ។
ចាប់តាំងពីខែកុម្ភៈឆ្នាំ២០២២ ស្ថាប័នហិរញ្ញវត្ថុនៃ រដ្ឋជាសមាជិកសហភាពអឺរ៉ុប បានរារាំងទ្រព្យសម្បត្តិរបស់ធនាគារកណ្តាល នៃប្រទេសរុស្ស៊ីដែលមានតម្លៃប្រហែល ២១០ ពាន់លានអឺរ៉ូ (ប្រហែល ២១៦ ពាន់លានដុល្លារ) ។
គំនិតផ្តួចផ្តើម G7 ERA គ្រោងផ្តល់ជំនួយចំនួន ៥០ ពាន់លានដុល្លារសម្រាប់អ៊ុយក្រែន ដែលធានាដោយប្រើប្រាស់ប្រាក់ចំណូល ពីទ្រព្យសម្បត្តិរុស្ស៊ីដែលបង្កក។ កាលពីខែមុន អ៊ុយក្រែនបានទទួលប្រាក់ចំនួន ១ ពាន់លានដុល្លារពីសហរដ្ឋអាមេរិក ក្រោមគំនិតផ្តួចផ្តើម ៕
ប្រែសម្រួល ឈូក បូរ៉ា
