បរទេស៖ សហរដ្ឋអាមេរិកបានបញ្ឈប់ ការផ្តល់ទិន្នន័យចាំបាច់ដល់អ៊ុយក្រែន ដើម្បីប្រើប្រាស់ប្រព័ន្ធរ៉ុក្កែតចល័ត (HIMARS) សម្រាប់ការវាយប្រហាររយៈចម្ងាយឆ្ងាយ ប្រឆាំងនឹងប្រទេសរុស្ស៊ី នេះបើយោងតាមលោក Oliver Carroll អ្នកសរសេរអត្ថបទរបស់ The Economist ។
យោងតាមសារព័ត៌មាន RT ចេញផ្សាយនៅថ្ងៃទី៦ ខែមីនា ឆ្នាំ២០២៥ បានឱ្យដឹងថា ការសម្រេចចិត្តនេះបានធ្វើឡើង បន្ទាប់ពីមន្ត្រីនៅទីក្រុងវ៉ាស៊ីនតោនបានបញ្ជាក់ថា ពួកគេបានបង្កកជំនួយយោធា និងការគាំទ្រផ្នែកចារកម្មដល់ទីក្រុងគៀវ បន្ទាប់ពីមានការឈ្លោះប្រកែកគ្នា រវាងមេដឹកនាំអ៊ុយក្រែនលោក Vladimir Zelensky និងប្រធានាធិបតីអាមេរិក Donald Trump ។
នៅក្នុងការបង្ហោះនៅលើ X កាលពីថ្ងៃពុធ លោក Carroll បានសរសេរថា “អាមេរិកបានកាត់តំណភ្ជាប់ព័ត៌មានសំខាន់សម្រាប់ការជូនដំណឹង” នៅម៉ោង ២ រសៀលម៉ោងនៅទីក្រុងគៀវ។ “មុននោះ៖ ការកំណត់គោលដៅទិន្នន័យសម្រាប់ HIMARS ។ អ៊ុយក្រែន ក៏មិនទទួលបានព័ត៌មានពេលវេលាជាក់ស្តែង សម្រាប់ការវាយប្រហាររយៈចម្ងាយឆ្ងាយដែរ»។
ប្រភពជាក់ស្តែងគឺសំដៅទៅលើការ លើកឡើងរបស់មេដឹកនាំអាមេរិក ដែលលោកបានចោទប្រកាន់លោក Zelensky ពីការមិនដឹងគុណចំពោះជំនួយ របស់អាមេរិកដល់ក្រុងគៀវ ដែលបានធ្វើជាការលើកឡើងចំពោះការផ្អាកជំនួយ។
ជាមួយគ្នានេះ នាយក CIA លោក John Ratcliffe បានបញ្ជាក់ថា អាមេរិកបានផ្អាកទាំងការចែករំលែកព័ត៌មានសម្ងាត់ និងការគាំទ្រប្រព័ន្ធអាវុធដល់ទីក្រុងគៀវ។ ទោះបីជាយ៉ាងណាក៏ដោយ លោកបានកត់សម្គាល់ថា ការរឹតបន្តឹងអាចត្រូវបានដកចេញ ប្រសិនបើអ៊ុយក្រែនបង្ហាញការប្តេជ្ញាចិត្ត ចំពោះការចរចាសន្តិភាពជាមួយរុស្ស៊ី៕
ប្រែសម្រួលៈ ណៃ តុលា
