បរទេស៖ ប្រធានាធិបតីអាមេរិក លោក Donald Trump បានប្រាប់ក្រុមពិសេសរបស់លោក រួមទាំងសមាជិកនៃគណៈរដ្ឋមន្ត្រីរបស់គាត់ថា ក្នុងពេលប៉ុន្មានសប្តាហ៍ខាងមុខនេះ លោក Elon Musk នឹងត្រូវដកពីតួនាទីបច្ចុប្បន្ន របស់លោកជាដៃគូអភិបាលកិច្ច ។
យោងតាមទស្សនាវដ្តី Politico ចេញផ្សាយនៅថ្ងៃទី២ ខែមេសា ឆ្នាំ២០២៥ បានឱ្យដឹងថា លោក Donald Trump នៅតែពេញចិត្តនឹងលោក Elon Musk និងគំនិតផ្តួចផ្តើមពីក្រសួង ប្រសិទ្ធភាពរដ្ឋាភិបាលរបស់លោក ប៉ុន្តែអ្នកទាំងពីរនាក់បានសម្រេចចិត្ត ក្នុងរយៈពេលប៉ុន្មានថ្ងៃថ្មីៗនេះថា ឆាប់ៗនេះនឹងដល់ពេលដែលលោក Musk ត្រឡប់ទៅរកអាជីវកម្មរបស់លោកវិញ ហើយទទួលតួនាទីគាំទ្រ , នេះបើយោងតាមអ្នកខាងក្នុងរបស់លោក Trump ចំនួន៣នាក់ដែលមិនបញ្ចេញឈ្មោះ ពណ៌នាអំពីទំនាក់ទំនងដែលកំពុងវិវត្តនេះ។
ការចាកចេញរបស់លោក Elon Musk កើតមានឡើង ខណៈដែលអ្នកខាងក្នុងរដ្ឋបាលលោក Trump មួយចំនួន និងសម្ព័ន្ធមិត្តខាងក្រៅជាច្រើន បានខកចិត្តជាមួយនឹងការមិនអាចទាយទុកជាមុនបាន ហើយកាន់តែចាត់ទុកមហាសេដ្ឋីរូបនេះថា ជាការទទួលខុសត្រូវផ្នែកនយោបាយ ។
មន្ត្រីរដ្ឋបាលជាន់ខ្ពស់ម្នាក់បាននិយាយថា លោក Musk ទំនងជារក្សាតួនាទីក្រៅផ្លូវការជាទីប្រឹក្សា និងបន្តបង្ហាញមុខម្តងម្កាលនៅសេតវិមាន។ មួយទៀតបានព្រមានថា អ្នកណាដែលគិតថា លោក Musk នឹងបាត់ខ្លួនទាំងស្រុងពីគន្លងរបស់លោក Trump គឺ “បោកប្រាស់ខ្លួនឯង” ។
ការផ្លាស់ប្តូរ, អ្នកខាងក្នុងបាននិយាយថា ទំនងជាត្រូវគ្នាទៅនឹងចុងបញ្ចប់នៃពេលវេលារបស់លោក Musk ជា “បុគ្គលិករដ្ឋាភិបាលពិសេស” ដែលជាស្ថានភាពពិសេសដែល លើកលែងគាត់ជាបណ្តោះអាសន្នពីក្រមសីលធម៌ និងច្បាប់ជម្លោះផលប្រយោជន៍មួយចំនួន។ រយៈពេល ១៣០ ថ្ងៃនោះ ត្រូវបានគេរំពឹងថានឹងផុតកំណត់នៅចុងខែឧសភា ឬដើមខែមិថុនា ៕
ប្រែសម្រួលៈ ណៃ តុលា
