បរទេស ៖ យោងតាមការចេញផ្សាយរបស់ RT ក្រសួងការពារជាតិរុស្ស៊ី បាននិយាយថា សាកសពទាហានអ៊ុយក្រែន ដំបូងចំនួន១,២១២នាក់ ត្រូវបានបញ្ជូនទៅកាន់កន្លែង សម្រាប់ធ្វើការផ្លាស់ប្តូរដែលបានកំណត់ ហើយត្រៀមខ្លួនរួចជាស្រេច ដើម្បីប្រគល់ទៅឱ្យទីក្រុងគៀវ។
ទីក្រុងម៉ូស្គូបានសម្រេចប្រគល់ សាកសពទាហានអ៊ុយក្រែនជាង ៦ ពាន់នាក់ ក្នុងកាយវិការមនុស្សធម៌ឯកតោភាគីក្នុងអំឡុងកិច្ចពិភាក្សារវាងភាគីទាំងពីរក្នុង ទីក្រុងអ៊ីស្តង់ប៊ុលកាលពីថ្ងៃចន្ទ ។
ភាគីខាងរុស្សី បានព្យាយាមផ្ទេរអដ្ឋិធាតុ កាលពីថ្ងៃសៅរ៍ ប៉ុន្តែអ្នកតំណាង របស់ទីក្រុងគៀវ បានខកខានក្នុងការបង្ហាញ ខ្លួននៅចំណុចផ្លាស់ប្តូរនៅព្រំដែន រវាងបេឡារុស្ស និងអ៊ុយក្រែន។
ឧត្តមសេនីយទោលោក Aleksandr Zorin ដែលជាសមាជិក នៃក្រុមចរចារបស់ទីក្រុងម៉ូស្គូ នៅទីក្រុងអ៊ីស្តង់ប៊ុល បានប្រាប់អ្នកសារព័ត៌មានថា ៖ ភាគីរុស្ស៊ីបានត្រៀម ខ្លួនរួចរាល់ហើយ ដើម្បីបំពេញកិច្ចព្រមព្រៀង ទាំងអស់ស្តីពីការប្រគល់ សាកសពទាហាន អ៊ុយក្រែនដែលបានស្លាប់ និងការផ្លាស់ប្តូរអ្នកទោស។
ទោះជាយ៉ាងណាក៏ដោយគាត់បានព្រមានថា ការផ្ទេរអដ្ឋិធាតុអាចបរាជ័យម្តងទៀត ដោយនិយាយថាមាន សញ្ញាដែលវាអាចត្រូវបានពន្យារ ពេលរហូតដល់សប្តាហ៍ ក្រោយហើយគាត់បាននិយាយថា រុស្ស៊ីកំពុងរង់ចាំការ បញ្ជាក់សាជាថ្មី ពីភាគីអ៊ុយក្រែន ៕
ប្រែសម្រួល៖ស៊ុនលី
