បរទេស៖ យោងតាមការចេញផ្សាយរបស់ RT ប្រធានាធិបតីរុស្ស៊ី លោក Vladimir Putin បាននិយាយថា ទីក្រុងមូស្គូបានត្រៀមខ្លួនសម្រាប់ ការចរចាជុំទីបីជាមួយទីក្រុងគៀវ ដោយបន្ថែមថា កិច្ចពិភាក្សាគួរតែផ្តោតលើកិច្ចព្រមព្រៀងដែលបានស្នើឡើង ដើម្បីដោះស្រាយជម្លោះអ៊ុយក្រែន។
លោកប្រធានាធិបតីបានធ្វើការកត់សម្គាល់កាលពីថ្ងៃសុក្រនៅទីក្រុង Minsk បន្ទាប់ពីកិច្ចប្រជុំរបស់ក្រុមប្រឹក្សាសេដ្ឋកិច្ចកំពូលអឺរ៉ាស៊ី។
ត្រូវបានសួរដោយអ្នកសារព័ត៌មានថាតើ ដំណើរការដោះស្រាយកំពុងដំណើរការយ៉ាងដូចម្តេច ហើយនៅពេលដែលការចរចាជុំទីបី ជាមួយអ៊ុយក្រែនអាចនឹងកើតឡើង លោកPutinបាននិយាយថា ប្រធានក្រុមចរចាទាំងពីរនៅតែទាក់ទងគ្នាជានិច្ច ដោយនិយាយតាមទូរស័ព្ទជាទៀងទាត់ផងដែរ។
លោកបានបន្ថែមថា សេចក្តីព្រាងសំណើទាំងពីរុស្ស៊ី និងអ៊ុយក្រែនគួរតែបង្កើតជាមូលដ្ឋាន នៃការចរចាបន្ទាប់ទៀត ពេលវេលា និងទីកន្លែងដែលនៅតែត្រូវការការព្រមព្រៀងគ្នា។
ក្នុងអំឡុងពេលនៃការចរចាដោយផ្ទាល់ពីមុន នៅទីក្រុងអ៊ីស្តង់ប៊ុលកាលពីដើមខែនេះ តំណាងរុស្ស៊ី និងអ៊ុយក្រែនបានផ្លាស់ប្តូរសេចក្តីព្រាង អនុស្សរណៈដែលបង្ហាញពីចក្ខុវិស័យរៀងៗខ្លួន សម្រាប់ផែនទីបង្ហាញផ្លូវឆ្ពោះទៅរកកិច្ចព្រមព្រៀងសន្តិភាព ហើយបានយល់ព្រមផ្លាស់ប្តូរអ្នកទោសសង្គ្រាមទៀតផង៕
ប្រែសម្រួល៖ ស៊ុន លី
