លោក ថាក់ស៊ីន និងលោកស្រី ផែតងតាន ចូលរួមកិច្ចប្រជុំបក្សភឿថៃជ្រើសរើសនាយករដ្ឋមន្រ្តីបន្ទាប់ ប៉ុន្តែចេញទៅវិញដោយមិននិយាយជាមួយ អ្នកសារព័ត៌មាន
បរទេស: គណបក្សភឿថៃ បានអះអាងជាថ្មីនូវការប្តេជ្ញាចិត្តរបស់ខ្លួនក្នុងការដឹកនាំ ការបង្កើតរដ្ឋាភិបាលបន្ទាប់របស់ប្រទេសថៃ ដោយទទូចថា ដៃគូសម្ព័ន្ធរបស់ខ្លួនកំពុងឈរយ៉ាងរឹងមាំ។
សារព័ត៌មាន The Nation ចេញផ្សាយនៅថ្ងៃទី៣០ ខែសីហានេះថា ថ្លែងទៅកាន់អ្នកសារព័ត៌មាននៅទីស្នាក់ការគណបក្សកាលពីថ្ងៃសុក្រ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក Phumtham Wechayachai បានបញ្ជាក់ថា រដ្ឋាភិបាលបច្ចុប្បន្ននៅតែ “កាន់ដៃគ្នាយ៉ាងមាំ” និងត្រៀមខ្លួនជាស្រេចដើម្បីធ្វើការ។
ការថ្លែងនេះបានធ្វើឡើងបន្ទាប់ពីកិច្ចប្រជុំដែលបានធ្វើឡើងបន្ទាប់ពីការសម្រេចចិត្តរបស់តុលាការធម្មនុញ្ញក្នុងការដកសិទ្ធិលោកស្រី Paetongtarn Shinawatra ពីតួនាទីជានាយករដ្ឋមន្ត្រី។
ចំណែកអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា និងលោកស្រី ផែតងតាន អ្នកទាំងពីរបានចូលរួមក្នុងកិច្ចប្រជុំនេះ ទោះបីជាលោកថាក់ស៊ីន បានចាកចេញទៅវិញនៅពេលក្រោយ ហើយបដិសេធមិននិយាយទៅកាន់ប្រព័ន្ធផ្សព្វផ្សាយក៏ដោយ។
លោក Phumtham បានច្រានចោលការអះអាងរបស់គណបក្ស Bhumjaithai ដែលថាខ្លួនទទួលបាន 280 សម្លេងដោយនិយាយថា “ប្រសិនបើពួកគេមាន 280 សម្លេងពួកគេនឹងក្លាយជារដ្ឋាភិបាលរួចហើយ” ។
លោកបានបន្ថែមថា ភឿថៃនៅតែមានទំនុកចិត្តលើជំហររបស់ខ្លួន ហើយថាដៃគូចម្រុះរបស់ខ្លួននៅតែគាំទ្រការដឹកនាំរបស់ខ្លួន។
នៅពេលសួរអំពីបេក្ខភាពនាយករដ្ឋមន្ត្រីរបស់បក្ស លោក Phumtham បានបញ្ជាក់ថា លោក Chaikasem Nitisiri នៅតែជាជម្រើសរបស់គណបក្ស។ លោកបានបញ្ជាក់ថា ខណៈពេលដែលការប្រកាសនឹងត្រូវធ្វើឡើងក្នុងពេលឆាប់ៗនេះ ការពិភាក្សាហ្មត់ចត់ជាមួយដៃគូចម្រុះទាំងអស់នៅតែត្រូវការជាចាំបាច់។
ប្រែសម្រួល ណៃ តុលា
Recommended for you
