មនុស្សរាប់រយនាក់ ភៀសខ្លួនចេញពីកន្លែងឆបោករបស់មីយ៉ាន់ម៉ា ចូលទៅកាន់ប្រទេសថៃ បន្ទាប់ពីមានការវាយឆ្មក់ដោយយោធា
បរទេស៖ មន្ត្រីប្រចាំខេត្តរបស់ថៃបានប្រាប់ AFP នៅថ្ងៃព្រហស្បតិ៍ថា មនុស្សជាង ៦០០ នាក់បានភៀសខ្លួនចេញពីមជ្ឈមណ្ឌលបោកប្រាស់ដ៏ធំបំផុតមួយរបស់ប្រទេសមីយ៉ាន់ម៉ា ហើយបានឆ្លងចូលទៅក្នុងប្រទេសថៃ។
យោងតាមសារព័ត៌មាន VN Express ចេញផ្សាយនៅថ្ងៃទី២៣ ខែតុលា ឆ្នាំ២០២៥ បានឱ្យដឹងថា បរិវេណដ៏ធំទូលាយដែលអ្នកបោកប្រាស់តាមអ៊ីនធឺណិតកំណត់គោលដៅមនុស្សដែលមានមនោសញ្ចេតនា និងបញ្ហាអាជីវកម្ម បានរីកដុះដាលនៅតាមបណ្តោយព្រំដែនដែលត្រូវបានគ្រប់គ្រងដោយរលុងរបស់ប្រទេសមីយ៉ាន់ម៉ា ក្នុងអំឡុងពេលសង្រ្គាមស៊ីវិលដែលបង្កឡើងដោយរដ្ឋប្រហារឆ្នាំ ២០២១ ។
ការបង្រ្កាបជាសាធារណៈយ៉ាងខ្លាំងដែលចាប់ផ្តើមក្នុងខែកុម្ភៈឃើញថា មានកម្មករប្រមាណ ៧០០០ នាក់ត្រូវបានធ្វើមាតុភូមិនិវត្តន៍ ហើយប្រទេសថៃបានបិទអ៊ីនធឺណិតឆ្លងព្រំដែន។
ប៉ុន្តែការស៊ើបអង្កេតរបស់ AFP ក្នុងខែនេះបានបង្ហាញថា ការសាងសង់បានបន្តដំណើរការល្អ ខណៈដែលអ្នកទទួលសេវាអ៊ីនធឺណេតរបស់ Starlink ត្រូវបានដំឡើងយ៉ាងទូលំទូលាយ ដែលហាក់ដូចជាភ្ជាប់មជ្ឈមណ្ឌលទៅកាន់បណ្តាញផ្កាយរណបដែលគ្រប់គ្រងដោយមហាសេដ្ឋីអាមេរិក Elon Musk ។
លោក Sawanit Suriyakul Na Ayutthaya អភិបាលរងខេត្ត Tak របស់ថៃ ដែលនៅតាមព្រំដែនមីយ៉ាន់ម៉ា បានប្រាប់ AFP ថា “មនុស្ស ៦៧៧ នាក់បានភៀសខ្លួនចេញពីមជ្ឈមណ្ឌលឆបោក” KK Park ក្នុងប្រទេសមីយ៉ាន់ម៉ា ឆ្លងទន្លេ Moei ចូលទៅក្នុងប្រទេសថៃ គិតត្រឹមព្រឹកថ្ងៃព្រហស្បតិ៍៕
ប្រែសម្រួលៈ ណៃ តុលា
