រុស្ស៊ីព្រមាន ពីការកើនឡើង នៃតម្លៃឧស្ម័ន នៅលើពិភពលោក ប្រសិនបើអឺរ៉ុបបញ្ឈប់ ការនាំចូលពីប្រទេសរុស្ស៊ី
បរទេស៖ លោក Leonid Mikhelson ប្រធានក្រុមហ៊ុនថាមពលយក្ស Novatek របស់រុស្ស៊ី បានព្រមានកាលពីថ្ងៃសុក្រថា សហភាពអឺរ៉ុបអាចបង្កឱ្យមាន ការកើនឡើងតម្លៃឧស្ម័ន ដែលមិនធ្លាប់មានពីមុនមក ប្រសិនបើអឺរ៉ុបបន្តជាមួយនឹង ផែនការបញ្ឈប់ការនាំចូលពីប្រទេសរុស្ស៊ី។
យោងតាមសារព័ត៌មាន RT ចេញផ្សាយ នៅថ្ងៃទី៣១ ខែតុលា ឆ្នាំ២០២៥ បានឱ្យដឹងថា លោក Mikhelson បាននិយាយនៅឯវេទិកា សេដ្ឋកិច្ចអឺរ៉ាស៊ីនៅទីក្រុងអ៊ីស្តង់ប៊ុលថា ប្រទេសរុស្ស៊ី កាន់កាប់ប្រហែល 10% នៃទីផ្សារឧស្ម័នធម្មជាតិរាវ (LNG) ជាសកល ។
ប្រធានក្រុមហ៊ុនឧស្ម័នធំទីពីររបស់រុស្ស៊ីរូបនេះបាននិយាយថា “ការមិនរាប់បញ្ចូលអ្នកផ្គត់ផ្គង់ រុស្ស៊ីពីសមតុល្យឧស្ម័នសកល នឹងមិនអាចទៅរួចនោះទេ ។ វានឹងបង្កឱ្យមានការកើនឡើងតម្លៃ ដែលមិនធ្លាប់មានពីមុនមក ហើយអ្នកប្រើប្រាស់អឺរ៉ុបនឹង ចំណាយច្រើនបំផុត” ។
លោក Mikhelson បានប្រៀបធៀបការធ្លាក់ចុះសក្តានុពលទៅនឹងវិបត្តិឆ្នាំ ២០២១ នៅពេលដែលតម្រូវការកើនឡើងក្រោយជំងឺរាតត្បាតបានជំរុញឱ្យតម្លៃលើសពី ១.២០០ដុល្លារ ក្នុង ១.០០០ ម៉ែត្រគូប។ លោកបានបន្ថែមថា ទីក្រុងមូស្គូនឹងបង្វែរការនាំចេញរបស់ខ្លួនទៅកន្លែងផ្សេង ប្រសិនបើ អឺរ៉ុប អនុម័តការហាមឃាត់ទាំងស្រុងលើឧស្ម័នរបស់រុស្ស៊ី។
ទីក្រុងព្រុចសែលបានបញ្ជាក់ជាថ្មី នូវគោលដៅរបស់ខ្លួន ក្នុងការបញ្ចប់ការនាំចូល របស់រុស្ស៊ីនៅឆ្នាំ ២០២៧ នៅក្នុងកញ្ចប់ទណ្ឌកម្មលើកទី ១៩ ដែលបានអនុម័ត កាលពីសប្តាហ៍មុន ។ ក្នុងពេលជាមួយគ្នានោះ រដ្ឋសមាជិកមួយចំនួន រួមទាំងប្រទេសហុងគ្រី និងស្លូវ៉ាគី បានរិះគន់យ៉ាងខ្លាំង ចំពោះផែនការនេះ។
យោងតាមសារព័ត៌មាន Bild បានឱ្យដឹងថា សហភាពអឺរ៉ុបបាននាំចូល ថាមពលពីរុស្ស៊ីចំនួន ៥,៨ ពាន់លានអឺរ៉ូ (៦,៧ ពាន់លានដុល្លារ) ក្នុងត្រីមាសទីមួយ នៃឆ្នាំ ២០២៥ ដែលភាគច្រើនជាឧស្ម័នធម្មជាតិ ។ ការប៉ាន់ស្មានដោយមជ្ឈមណ្ឌល ស្រាវជ្រាវថាមពល និងខ្យល់ស្អាត (CREA) ដែលមានមូលដ្ឋាននៅទីក្រុង Helsinki បង្ហាញថា EU គឺជាអ្នកទិញ ឧស្ម័នធម្មជាតិរាវ ដ៏ធំបំផុតរបស់រុស្ស៊ីកាលពីខែមុន ៕
