តូក្យូ៖ លោកនាយករដ្ឋមន្រ្តីជប៉ុន ស៊ីនហ្សូ អាបេ បានឲ្យដឹងកាលពីថ្ងៃសុក្រថា ប្រទេសជប៉ុន នឹងអំពាវនាវ ឱ្យមានការស៊ើបអង្កេត លើការឆ្លើយតបដំបូង របស់អង្គការ សុខភាពពិភពលោក ចំពោះការរាតត្បាតវីរុសនេះ។
នៅលើកម្មវិធីអ៊ីនធឺណិត លោកនាយករដ្ឋមន្រ្តី អាបេ បានលើកឡើងថា “ជាមួយសហភាពអ៊ឺរ៉ុប ជប៉ុន នឹងស្នើឱ្យមានការផ្ទៀងផ្ទាត់ ត្រឹមត្រូវឯករាជ្យ និងគ្រប់ជ្រុងជ្រោយ”។
លោកបានបន្ដថា សំណើនេះនឹងត្រូវធ្វើឡើង នៅក្នុងមហាសន្និបាត របស់អង្គការសុខភាពពិភពលោក ដែលនឹងចាប់ផ្តើម នៅថ្ងៃច័ន្ទខាងមុខនេះ។
រដ្ឋមន្រ្តីក្រសួងការបរទេសលោក Toshimitsu Motegi ក៏បានឲ្យដឹងកាល ពីថ្ងៃសុក្រផងដែរថា ប្រទេសជប៉ុន កំពុងចូលរួមក្នុងការអំពាវនាវ ឱ្យមានការស៊ើបអង្កេតបែបនេះ ហើយការស៊ើបអង្កេត គួរតែត្រូវបានធ្វើឡើង ដោយស្ថាប័នឯករាជ្យ៕
ដោយ៖ ឈូក បូរ៉ា
