អ៊ីស្រាអែល ចាប់ខ្លួនបុរសម្នាក់ ដែលត្រូវបានចោទ ប្រកាន់ពីបទ ធ្វើចារកម្មឱ្យអ៊ីរ៉ង់
យេរូសាឡឹម ៖ កងកម្លាំងសន្តិសុខអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា ពួកគេបានចាប់ខ្លួនអ្នកស្រុក Tel Aviv ម្នាក់ដែលសង្ស័យថា បានប្រមូលព័ត៌មាន ស៊ើបការណ៍ សម្ងាត់សម្រាប់អ៊ីរ៉ង់ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
យោងតាមការស៊ើបអង្កេតរួមគ្នា ដោយអង្គភាពឧក្រិដ្ឋកម្ម តាមអ៊ីនធឺណិតរបស់ប៉ូលីស និងទីភ្នាក់ងារសន្តិសុខផ្ទៃក្នុង Shin Bet ជនជាតិអ៊ីស្រាអែលអាយុ ២៧ ឆ្នាំរូបនេះត្រូវបានចោទប្រកាន់ថា បានផ្តួចផ្តើមទំនាក់ទំនងជាមួយភ្នាក់ងារអ៊ីរ៉ង់ តាមរយៈបណ្តាញសង្គម ហើយបានអនុវត្តការងារ សម្រាប់ពួកគេជាថ្នូរនឹងការបង់ប្រាក់។
អ្នកស៊ើបអង្កេតបានឲ្យដឹងថា គាត់បានថតទីតាំងជាច្រើន តាមការស្នើសុំ របស់ប្រតិបត្តិករអ៊ីរ៉ង់របស់គាត់ រួមទាំងសារមន្ទីរសិល្បៈ Tel Aviv ឧទ្យានដ៏ប្រណីតមួយនៅក្នុងសង្កាត់ Bavli និងទីតាំងនៃការបាញ់គ្រាប់រ៉ុក្កែតអ៊ីរ៉ង់នៅជិត Ramat Gan ។ ជាថ្នូរវិញ រូបគេត្រូវ បានចោទប្រកាន់ថា បានទទួលប្រាក់រាប់ពាន់សេកែល ដែលបានផ្ទេរ ជារូបិយប័ណ្ណគ្រីបតូ ទៅកាន់កាបូបឌីជីថល ដែលគ្រប់គ្រងដោយជនជាតិអ៊ីរ៉ង់។
ជនសង្ស័យត្រូវបានចាប់ខ្លួនកាលពីថ្ងៃព្រហស្បតិ៍សប្តាហ៍មុន ហើយការឆែកឆេរផ្ទះរបស់ជនសង្ស័យរូបនេះ បានរកឃើញភស្តុតាងឌីជីថល និងស៊ីមកាតចំនួន ១៨ ដែលត្រូវបានចោទប្រកាន់ថា បានប្រើដើម្បីទំនាក់ទំនងជាមួយអ្នកគ្រប់គ្រងអ៊ីរ៉ង់ នេះបើយោងតាមសេចក្តីថ្លែងការណ៍ ។ ចាប់តាំងពីការចាប់ផ្តើមសង្គ្រាមនៅហ្គាហ្សាក្នុងឆ្នាំ ២០២៣ មក Shin Bet បានរកឃើញករណីចារកម្មជាង ២០ ករណីដែលពាក់ព័ន្ធនឹងជនជាតិអ៊ីស្រាអែល ដែលសង្ស័យថាធ្វើការឱ្យចារកម្មអ៊ីរ៉ង់៕
