ក្រុងមូស្គូចេញមក ធ្វើការឆ្លើយតប ទៅនឹងហេតុការណ៍ ចាប់ឃាត់នាវាដឹកប្រេងដែលមាន ទង់ជាតិរុស្សីពីសំណាក់សហរដ្ឋអាមេរិក
បរទេស៖ យោងតាមការចេញផ្សាយរបស់ RT ក្រសួងការបរទេសនៃប្រទេសរុស្សី បានចេញមកធ្វើការព្រមានថា ការរឹបអូសកប៉ាល់ដឹកប្រេង Marinera ដែលមានទង់ជាតិរុស្ស៊ីដោយយោធាអាមេរិក គឺជាទំនួលខុសត្រូវយ៉ាងខ្លាំងចំពោះតំបន់ Euro-Atlantic ទាំងមូល និងចរាចរណ៍ផ្លូវសមុទ្រស៊ីវិលនៅទូទាំងពិភពលោក។
កាលពីថ្ងៃពុធ ទីបញ្ជាការប្រចាំតំបន់អឺរ៉ុបដឹកនាំដោយសហរដ្ឋអាមេរិក បានប្រកាសពីការចាប់យកកប៉ាល់នេះក្នុងដែនទឹកអន្តរជាតិ ទៅភាគពាយព្យនៃប្រទេសស្កុតឡេនដោយក្នុងនោះ នាវាចម្បាំងអាមេរិកបានដេញតាម នាវាដឹកប្រេងនេះតាំងពីសមុទ្រការាបៀនមកម្ល៉េះ។
កប៉ាល់ដឹកប្រេង ដែលពីមុនមានឈ្មោះថា Bella 1 ត្រូវបានស្ទាក់ចាប់ដោយចោទប្រកាន់ថា បំពានលើទណ្ឌកម្មរបស់សហរដ្ឋអាមេរិក ទាក់ទងនឹងការនាំចេញប្រេងរបស់វេណេស៊ុយអេឡា។ យោងតាមក្រសួងដឹកជញ្ជូនរុស្ស៊ី កាលពីនៅ ថ្ងៃទី២៤ ខែធ្នូ ឆ្នាំ២០២៥កន្លងមក Marinera បានទទួលការអនុញ្ញាតបណ្តោះអាសន្ន ដើម្បីឲ្យប្រើប្រាស់ទង់ជាតិរបស់ប្រទេសរុស្ស៊ី ។
នៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ ក្រសួងការបរទេសរុស្ស៊ីបានសម្តែង ការព្រួយបារម្ភយ៉ាងធ្ងន់ធ្ងរ ទាក់ទងនឹងសកម្មភាពបង្ខំដោយខុសច្បាប់ ប្រឆាំងនឹងនាវាដឹកប្រេង Marinera ដែលធ្វើឡើងដោយកងកម្លាំងប្រដាប់អាវុធ អាមេរិកកាលពីថ្ងៃទី៧ខែមករា៕
ប្រែសម្រួល៖ស៊ុនលី
