Financial Times ផ្សាយថា ប្រទេសថៃត្រូវបានដាក់ស្លាកថា ជា «អ្នកជំងឺនៅអាស៊ី»
បរទេស៖ កាសែត Financial Times របស់អង់គ្លេសបានចេញផ្សាយអត្ថបទមួយដែលមានចំណងជើងថា «របៀបដែលប្រទេសថៃបានក្លាយជា «អ្នកជំងឺនៅអាស៊ី» ដោយព្រមានថា សេដ្ឋកិច្ចរបស់ប្រទេសថៃជាប់គាំងនៅប្រហែល ២% អស់រយៈពេលជាច្រើនឆ្នាំ ដោយសារការប្រើប្រាស់ ការផលិត និងទេសចរណ៍ចុះខ្សោយ។ ធ្លាប់ជា «សេដ្ឋកិច្ចខ្លា» នៅអាស៊ី ប្រទេសថៃឥឡូវនេះប្រឈមមុខនឹងការធ្លាក់ចុះនៃអំណាចទិញ និងសម្ពាធកាន់តែខ្លាំងឡើងលើគ្រួសារ។
យោងតាមសារព័ត៌មាន Khaosod English ចេញផ្សាយនៅយប់ថ្ងៃទី៤ ខែកុម្ភៈ ឆ្នាំ២០២៦ បានឱ្យដឹងថា របាយការណ៍នេះបានលើកឡើងពីបញ្ហារចនាសម្ព័ន្ធយ៉ាងជ្រៅ រួមទាំងចំនួនប្រជាជនវ័យចំណាស់ បំណុលគ្រួសារជិត ៩០% នៃផលិតផលក្នុងស្រុកសរុប ការថយចុះនៃការប្រកួតប្រជែង និងអស្ថិរភាពនយោបាយយូរអង្វែង។ វិស័យផលិតកម្ម និងវិស័យរថយន្តបានធ្លាក់ចុះ ខណៈពេលដែលវិស័យទេសចរណ៍នៅតែទាបជាងកម្រិតមុនជំងឺរាតត្បាត ក្នុងចំណោមការព្រួយបារម្ភអំពីសុវត្ថិភាព និងការប្រកួតប្រជែងក្នុងតំបន់។
កាសែត Financial Times ព្រមានថា បើគ្មានកំណែទម្រង់រចនាសម្ព័ន្ធខ្លាំងក្លា និងម៉ាស៊ីនកំណើនថ្មីទេ ប្រទេសថៃប្រឈមនឹងការធ្លាក់ចុះសេដ្ឋកិច្ចបន្ថែមទៀត ដោយអ្នកសេដ្ឋកិច្ចព្រមានថា ស្លាក «អ្នកជំងឺនៅអាស៊ី» អាចនឹងស្ថិតស្ថេរ។
ប្រែសម្រួលៈ ណៃ តុលា
