ចឹងសោះ! ករណីចោរប្លន់មាស ៥៥តម្លឹង នៅខេត្តបាត់ដំបង ជារឿងប្រឌិត កូនចាញ់ល្បែងអនឡាញ យកមាសឪម៉ែទៅលក់សងបំណុល
បាត់ដំបង៖ ការពិតត្រូវបានលាតត្រដាង ចំពោះករណីល្បីកក្រើកខេត្តបាត់ដំបង ចោរប្លន់មាស៥៥តម្លឹង ពេលនេះស្នងការខេត្តបាត់ដំបង បានបើកការស៊ើបអង្កេត និងស្រាវជ្រាវឃើញថាគឺជារឿងប្រឌិតទាំងស្រុង ដោយការពិតបុគ្គលឈ្មោះ អ៊ុំ សុខចំរើន បានយកមាសរបស់ឪពុកម្តាយនេះ ទៅសងបំណុលគេ ព្រោះជំពាក់រឿងចាញ់ល្បែងអនឡាញ ។
បើយោងតាមសេចក្តីបំភ្លឺព័ត៌មាន របស់ស្នងការដ្ឋាននគរបាលខេត្តបាត់ដំបង បានឱ្យដឹងថា កាលពីថ្ងៃទី១ ខែកុម្ភៈឆ្នាំ២០២៦ នៅក្រុងបាត់ដំបង បានលេចឡើងនូវព័ត៌មានថា មានករណីចោរប្លន់លំនៅឋាន ចំនួន០២ករណី ដាច់ដោយឡែកពីគ្នាក្នុងអំឡុងពេលមិនដល់មួយម៉ោងផង ។
ឈ្មោះ អ៊ុំ សុខចំរើន ភេទប្រុស អាយុ៣០ឆ្នាំ រស់នៅភូមិព្រែក ព្រះស្តេច សង្កាត់ព្រែកព្រះស្តេច ក្រុងបាត់ដំបង មានមុខរបរជាងស្លរំលាយមាស បានអះអាងថា ខ្លួនត្រូវជនសង័្សយ ប្រើកាំបិតចាក់ខ្លួន ប្លន់មាសដុំ អស់ចំនួន ៥៥តម្លឹង (ហាសិបប្រាំតម្លឹង)។
ដោយឡែក ស្រ្តីឈ្មោះមៀន ម៉ារិយា អាយុ៣៦ឆ្នាំ រស់នៅភូមិកាប់គោថ្មី សង្កាត់អូរចារ ក្រុងបាត់ដំបង ក៏បានអះអាងថា ខ្លួនត្រូវជនសង័្សយប្រេីកាំបិតគំរាមប្លន់យកកាបូប ដែលមានប្រាក់ដុល្លានិងគ្រឿងអលង្ការផង ប្រមាណជាង ២០០០ដុល្លា (ពីរពាន់ដុល្លារ) នាថ្ងៃដដែលនេះ។
ស្នងការដ្ឋាននគរបាលខេត្តបាត់ដំបង បញ្ជាក់ថា៖
១- ករណីដែលថា ចោរប្លន់មាស ចំនួន៥៥តម្លឹង គឺជារឿងប្រឌិត របស់ឈ្មោះ អ៊ុំ សុខចំរើន តែម្នាក់ឯង ដដោយការពិតខ្លួនយកមាសរបស់ឪពុកម្តាយនេះ ទៅសងបំណុលគេ ព្រោះជំពាក់រឿងចាញ់ល្បែងអនឡាញ។
២- ករណីដែលថាចោរប្លន់ប្រាក់និងគ្រឿងអលង្ការនោះ គឺជារឿងប្រឌិតរបស់ស្រ្តីឈ្មោះ មៀន ម៉ារិយា ពព្រោះខ្លួនខឹងនឹងប្តីរបស់ខ្លួន មានប្រពន្ធចុង ទេីបប្រឌិតរឿងបែបនេះ ដើម្បីឱ្យប្តីគឹតគូរមករកខ្លួនវិញ។
ជាសរុបមក ករណីដែលផ្សព្វផ្សាយថា មានចោរប្លន់មាសនិងប្រាក់ទាំងកណ្តាលថ្ងៃ នៅក្រុងបាត់ដំបង ទាំង០២ករណីនេះ គឺជារឿងប្រឌិតទាំងស្រុង ដែលការពិត គឺមិនមានករណីចោរប្លន់នេះកើតមាននោះទេ។
ទោះជាបែបនេះក្តី សមត្ថកិច្ចនគរបាល នឹងចាត់វិធានការតាមផ្លូវច្បាប់ ចំពោះសាមីខ្លួនដែលបានប្រឌិតព័ត៌មាននេះឡើង បង្កឱ្យប៉ះពាល់ដល់សណ្តាប់ធ្នាប់សង្គម ធ្វើឱ្យការងារសន្តិសុខសង្គមនៅក្នុងមូលដ្ឋានខេត្តបាត់ដំបង ទទួលរងនូវភាពស្រអាប់ បង្កការភ័យខ្លាចដល់មហាជន ភ្ញៀវទេសចរជាតិ អន្តរជាតិ ដែលមានបំណងមកកាន់ខេត្តបាត់ដំបង ព្រោះតែព័ត៌មានបំពុលសង្គមបែបនេះ៕
