រុស្ស៊ី ចាត់ទុកថា ការរឹតបន្តឹងថ្មីប្រឆាំងនឹងគុយបា ជារឿងមិនអាចទទួលយកបាន
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានឧ្យដឹងក្នុងអំឡុងពេលជួបជាមួយរដ្ឋមន្ត្រីការបរទេសគុយបា លោក Bruno Rodriguez Parrilla ដោយលោកបានចាត់ទុកថា ការរឹតបន្តឹងថ្មីប្រឆាំងនឹងគុយបា ជារឿងមិនអាចទទួលយកបាន។
យោងតាមលោក ពូទីន បានឧ្យដឹងថា រុស្ស៊ី និងគុយបា មានទំនាក់ទំនងពិសេសដែលបង្កើតឡើងដោយប្រវត្តិសាស្ត្រ ហើយទីក្រុងមូស្គូគាំទ្រប្រជាជនគុយបា ជានិច្ចក្នុងការតស៊ូដើម្បីឯករាជ្យភាព និងសិទ្ធិរបស់ពួកគេក្នុងការបន្តផ្លូវអភិវឌ្ឍន៍ផ្ទាល់ខ្លួន។
លោក ពូទីន ក៏បានឧ្យដឹងផងដែរថា ទំនាក់ទំនងទ្វេភាគីរវាងប្រទេសទាំងពីរកំពុងអភិវឌ្ឍក្នុងទិសដៅវិជ្ជមានជាទូទៅ ហើយបានសម្តែងទំនុកចិត្តថា កិច្ចប្រជុំនេះនឹងផ្តល់ឱកាសដើម្បីពិភាក្សាអំពីទំនាក់ទំនងលម្អិត។
គួរបញ្ជាក់ថា កាលពីថ្ងៃពុធ រដ្ឋមន្ត្រីការបរទេសរុស្ស៊ី លោក Sergei Lavrov បានឧ្យដឹងថា រុស្ស៊ីអំពាវនាវឱ្យសហរដ្ឋអាមេរិកចៀសវាងការដាក់របាំងកងទ័ពជើងទឹកលើគុយបា៕
ប្រែសម្រួល ឈូក បូរ៉ា
