លោក ដូណាល់ ត្រាំ បញ្ជាឱ្យក្រសួងសង្គ្រាម បញ្ចេញឯកសារពាក់ព័ន្ធ នឹងមនុស្សភពក្រៅ និង UFO
បរទេស៖ ប្រធានាធិបតី អាមេរិក លោក ដូណាល់ ត្រាំ បានប្រកាសថា លោកនឹងបញ្ជាឱ្យក្រសួងសង្គ្រាម និងទីភ្នាក់ងារផ្សេងទៀត ចេញផ្សាយឯកសាររបស់រដ្ឋាភិបាលទាក់ទងនឹងជីវិតមនុស្សភពក្រៅ ដោយសារតែ “ការចាប់អារម្មណ៍យ៉ាងខ្លាំង”។
យោងតាមសារព័ត៌មាន RT ចេញផ្សាយនៅថ្ងៃទី២០ ខែកុម្ភៈ ឆ្នាំ២០២៦ បានឱ្យដឹងថា នៅក្នុងការបង្ហោះមួយនៅលើ Truth Social នៅថ្ងៃសុក្រ លោក ត្រាំ បាននិយាយថា ឯកសារដែលត្រូវបានសម្គាល់សម្រាប់ការបង្ហាញនឹងគ្របដណ្តប់លើបាតុភូតផ្លូវអាកាសដែលមិនស្គាល់អត្តសញ្ញាណ និងវត្ថុហោះហើរដែលមិនស្គាល់អត្តសញ្ញាណ រួមជាមួយនឹង “ព័ត៌មានផ្សេងទៀតទាំងអស់ដែលទាក់ទងនឹងបញ្ហាស្មុគស្មាញខ្លាំង ប៉ុន្តែគួរឱ្យចាប់អារម្មណ៍ និងសំខាន់ទាំងនេះ”។
លោក ត្រាំ បានធ្វើការប្រកាសបែបនេះប៉ុន្មានម៉ោងបន្ទាប់ពីចោទប្រកាន់អតីតប្រធានាធិបតីអាមេរិក គឺលោក បារ៉ាក់ អូបាម៉ា ពីបទបង្ហាញ “ព័ត៌មានសម្ងាត់” នៅពេលដែលលោកបានណែនាំនៅក្នុងបទសម្ភាសន៍ផតខាសថ្មីៗនេះថា មនុស្សភពក្រៅមានពិតប្រាកដ។
ការកត់សម្គាល់របស់លោក អូបាម៉ា បានរីករាលដាលពាសពេញអ៊ីនធឺណិតកាលពីចុងសប្តាហ៍មុន បន្ទាប់ពីពិធីករផតខាស លោក Brian Tyler Cohen បានសួរអតីតប្រធានាធិបតីថាតើមនុស្សភពក្រៅមានឬអត់៕
ប្រែសម្រួលៈ ណៃ តុលា
