កងទ័ពម៉ិកស៊ិក សម្លាប់មេដឹកនាំ ក្រុមជួញដូរគ្រឿង ញៀនដ៏មានឥទ្ធិពលម្នាក់ទៀត ហើយក៏បានធ្វើឲ្យមានប្រតិកម្មខ្លាំង ពីក្រុមជួញដូរគ្រឿងញៀន
បរទេស៖ កងទ័ពម៉ិកស៊ិកបានសម្លាប់ មេដឹកនាំក្រុមជួញដូរគ្រឿងញៀន ដ៏មានឥទ្ធិពលម្នាក់ គឺលោក Nemesio Rubén Oseguera Cervantes ដែលមានឈ្មោះ ហៅក្រៅថា “El Mencho” កាលពីថ្ងៃអាទិត្យ ដោយកាត់ក្បាលអ្វី ដែលបានក្លាយជា ក្រុមជួញដូរគ្រឿងញៀន ដ៏មានឥទ្ធិពលបំផុតរបស់ម៉ិកស៊ិក និងបានរុញច្រានប្រទេសទាំង មូលឱ្យមានភាពវឹកវរ។
យោងតាមសារព័ត៌មាន AP ចេញផ្សាយ នៅថ្ងៃទី២៣ ខែកុម្ភៈ ឆ្នាំ២០២៦ថា ស្តេចគ្រឿងញៀនរូបនេះគឺជារង្វាន់ ដ៏ធំបំផុតរបស់រដ្ឋាភិបាលម៉ិកស៊ិក ដែលមិនទាន់ បានបង្ហាញដល់រដ្ឋបាលលោក Trump ក្នុងកិច្ចខិតខំប្រឹងប្រែងរបស់ខ្លួន ក្នុងការបង្ក្រាបក្រុមជួញដូរគ្រឿងញៀន ហើយការស្លាប់របស់មេដឹកនាំ ក្រុមជួញដូរគ្រឿងញៀនដ៏មានឥទ្ធិពលម្នាក់រូបនេះ ត្រូវបានជួបប្រទះនឹងប្រតិកម្ម យ៉ាងខ្លាំងពីក្រុមជួញដូរគ្រឿងញៀន ដែលត្រូវបានគេស្គាល់ដោយ អក្សរកាត់ជាភាសាអេស្ប៉ាញ CJNG។
រថយន្តដែលត្រូវបានដុតបំផ្លាញដោយសមាជិកក្រុមជួញដូរគ្រឿងញៀនបានបិទផ្លូវនៅក្នុងរដ្ឋម៉ិកស៊ិកជាច្រើន បន្សល់ទុកផ្សែងហុយឡើងលើអាកាស។ រដ្ឋធានី Guadalajara ត្រូវបានប្រែក្លាយទៅជាទីក្រុងខ្មោចនៅយប់ថ្ងៃអាទិត្យ ខណៈដែលជនស៊ីវិលបានប្រមូលផ្តុំគ្នា នៅកន្លែងមានសុវត្ថិភាព។ សាលារៀនត្រូវបានលុបចោល នៅថ្ងៃច័ន្ទនៅក្នុងរដ្ឋជាច្រើន។
លោក Oseguera Cervantes បានរងរបួសនៅក្នុងប្រតិបត្តិការ មួយដើម្បីចាប់ខ្លួនកាលពីថ្ងៃអាទិត្យនៅ Tapalpa រដ្ឋ Jalisco ចម្ងាយ នៃការបើកបរប្រហែល ពីរម៉ោងនៅភាគនិរតីនៃ Guadalajara ហើយគាត់បានស្លាប់ ខណៈពេលកំពុង បញ្ជូនតាមយន្តហោះ ទៅកាន់ទីក្រុងម៉ិកស៊ិក នេះបើយោងតាមសេចក្តីថ្លែងការណ៍ របស់ក្រសួង ការពារជាតិ ។ រដ្ឋនេះគឺជាមូលដ្ឋាននៃក្រុមជួញដូរគ្រឿងញៀន ដែលត្រូវបានគេស្គាល់ថា សម្រាប់ការជួញដូរថ្នាំញៀនហ្វេនតានីល និងគ្រឿងញៀនដទៃទៀតក្នុងបរិមាណដ៏ច្រើននាំទៅកាន់សហរដ្ឋអាមេរិក៕
ប្រែសម្រួលៈ ណៃ តុលា
