លោក ត្រាំថា លោកនឹងដាក់ពង្រាយនាវាមន្ទីរពេទ្យមួយទៅកាន់កោះហ្គ្រីនឡែន ដោយលោកបានអះអាងថា មនុស្សជាច្រើននៅទីនោះធ្លាក់ខ្លួនឈឺ ហើយមិនទទួលបានការថែទាំ
បរទេស៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា លោកនឹងដាក់ពង្រាយនាវាមន្ទីរពេទ្យមួយទៅកាន់កោះហ្គ្រីនឡែន ដោយលោកបានអះអាងថា មនុស្សជាច្រើននៅទីនោះធ្លាក់ខ្លួនឈឺ ហើយមិនទទួលបានការថែទាំ ទោះបីជានាវាមន្ទីរពេទ្យទាំងពីររបស់កងទ័ពជើងទឹកសហរដ្ឋអាមេរិកកំពុងចតនៅកន្លែងផលិតកប៉ាល់មួយក្នុងរដ្ឋអាឡាបាម៉ាក៏ដោយ។
យោងតាមសារព័ត៌មាន AP ចេញផ្សាយនៅថ្ងៃទី២៣ ខែកុម្ភៈ ឆ្នាំ២០២៦ បានឱ្យដឹងថា ការប្រកាសរបស់លោក ត្រាំ បានជំរុញឱ្យមានការការពារនៅថ្ងៃអាទិត្យពីប្រព័ន្ធថែទាំសុខភាពរបស់ប្រទេសដាណឺម៉ាក និងកោះហ្គ្រីនឡែន ហើយវាគឺជាចំណុចចុងក្រោយនៃការប៉ះទង្គិចជាមួយមេដឹកនាំអាមេរិក ដែលតែងតែនិយាយអំពីការដណ្តើមយកទឹកដីអាកទិកដ៏ធំសម្បើមនេះ។
លោក Jens-Frederik Nielsen នាយករដ្ឋមន្ត្រីហ្គ្រីនឡែន បានមានប្រសាសន៍ថា “វាមិនមែនជាការអរគុណទេពីទីនេះ”។
ការបង្ហោះនៅលើប្រព័ន្ធផ្សព្វផ្សាយសង្គមរបស់លោក ត្រាំ អំពីនាវាមន្ទីរពេទ្យមួយបានកើតឡើងបន្ទាប់ពីយោធារបស់ប្រទេសដាណឺម៉ាក បាននិយាយថា កងកម្លាំងបញ្ជាការអាកទិករបស់ខ្លួនកាលពីថ្ងៃសៅរ៍ បានជម្លៀសសមាជិកនាវិកម្នាក់នៃនាវាមុជទឹកអាមេរិកចេញពីឆ្នេរសមុទ្រហ្គ្រីនឡែន ដើម្បីទទួលបានការព្យាបាលបន្ទាន់៕
ប្រែសម្រួលៈ ណៃ តុលា
