លោក ដូណាល់ ត្រាំ កំពុងពិចារណាកាត់បន្ថយ ការវាយប្រហារលើអ៊ីរ៉ង់
វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឧ្យដឹងថា លោកកំពុងពិចារណា «កាត់បន្ថយ» ការវាយប្រហារយោធារបស់សហរដ្ឋអាមេរិកប្រឆាំងនឹងអ៊ីរ៉ង់ ដោយអះអាងថា សហរដ្ឋអាមេរិក «កំពុងខិតជិតដល់» ការសម្រេចគោលបំណងរបស់ខ្លួនហេីយ។
លោក ត្រាំ បានឧ្យដឹងនៅលើបណ្ដាញ Truth Social របស់លោកថា «យើងកំពុងខិតជិតដល់ការសម្រេច គោលបំណងរបស់យើង ខណៈពេលដែលយើងពិចារណា កាត់បន្ថយកិច្ចខិតខំប្រឹងប្រែងយោធា ដ៏អស្ចារ្យរបស់យើងនៅមជ្ឈិមបូព៌ា» ទាក់ទងនឹងអ៊ីរ៉ង់។
គោលបំណងដែលលោក ត្រាំ បានគូសបញ្ជាក់រួមមាន ការកាត់បន្ថយសមត្ថភាពមីស៊ីលរបស់អ៊ីរ៉ង់ ការបំផ្លាញមូលដ្ឋានឧស្សាហកម្មការពារជាតិរបស់ប្រទេសនេះ ការលុបបំបាត់កងទ័ពជើងទឹក និងអាកាសរបស់អ៊ីរ៉ង់ និងការរារាំងប្រទេសនេះពីការខិតជិតទៅនឹងសមត្ថភាពនុយក្លេអ៊ែរ និងការការពារសម្ព័ន្ធមិត្តអាមេរិកនៅទូទាំងតំបន់។ ប៉ុន្ដែនៅរសៀលថ្ងៃសុក្រផងដែរ លោក ត្រាំ បានឧ្យដឹងថា លោកមិនចង់បានបទឈប់បាញ់ជាមួយអ៊ីរ៉ង់នោះទេ។
លោក ដូណាល់ ត្រាំ បានប្រាប់អ្នកយកព័ត៌មានមុនពេលលោកចាកចេញពីសេតវិមានទៅកាន់រដ្ឋ Florida ថា «យើងអាចមានការសន្ទនា ប៉ុន្តែអ្នកដឹងទេ ខ្ញុំមិនចង់ធ្វើបទឈប់បាញ់នោះទេ អ្នកមិនធ្វើបទឈប់បាញ់នោះទេ នៅពេលដែលអ្នកពិតជាកំពុងបំផ្លាញភាគីម្ខាងទៀត»។
លោកបានបញ្ជាក់ថា «ពីទស្សនៈយោធា ពួកគេបានបញ្ចប់ហើយ ពួកគេមិនមានកងទ័ពជើងទឹក។ ពួកគេមិនមានកងទ័ពអាកាសនោះទេ។ ពួកគេមិនមានឧបករណ៍អ្វីទាំងអស់។ ពួកគេមិនមានអ្នកសង្កេតការណ៍ទេ ពួកគេក៏មិនមានយន្តហោះប្រឆាំង យន្តហោះដែរ ពួកគេមិនមានរ៉ាដា ហើយមេដឹកនាំរបស់ពួកគេទាំងអស់ ត្រូវបានសម្លាប់នៅគ្រប់កម្រិតទាំងអស់»៕
ប្រែសម្រួល ឈូក បូរ៉ា
