សម្តេចធិបតី ៖ រាជរដ្ឋាភិបាល នៅតែផ្តល់អាទិភាពខ្ពស់ និងចាត់ទុកប្រជាជនជាស្នូល តាមរយៈការលើកកម្ពស់សុខភាព
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងប្រាប់ UNAIDS ថា រាជរដ្ឋាភិបាល នៅតែផ្តល់អាទិភាពខ្ពស់ និងចាត់ទុកប្រជាជនជាស្នូល តាមរយៈការលើកកម្ពស់សុខភាព, ការអប់រំ និងការបង្កើតការងារ ដែលជាគ្រឹះដ៏រឹងមាំរបស់ប្រទេសជាតិ ។
ការថ្លែងរបស់សម្តេចធិបតី ហ៊ុន ម៉ាណែត ធ្វើឡើងអំឡុងពេល អនុញ្ញាតឱ្យ លោក Eamonn Murphy នាយកប្រចាំតំបន់អាស៊ី-ប៉ាស៊ីហ្វិក, អឺរ៉ុបខាងកើត, និងអាស៊ីកណ្តាល នៃកម្មវិធីសហប្រជាជាតិរួមគ្នា ស្តីពីមេរោគអេដស៍/ជំងឺអេដស៍ (UNAIDS) ចូលជួបសម្តែងការគួរសម និងពិភាក្សាការងារ នាថ្ងៃទី១២ ខែមិថុនា ឆ្នាំ២០២៦ នៅវិមានសន្តិភាព។
ក្នុងជំនួបនេះ លោកនាយកប្រចាំតំបន់ Eamonn Murphy បានសម្ដែងនូវការវាយតម្លៃខ្ពស់ ចំពោះការយកចិត្តទុកដាក់ និង ភាពជាអ្នកដឹកនាំ របស់រាជរដ្ឋាភិបាលកម្ពុជា ក្នុងការលើកកម្ពស់សុខភាពសាធារណៈ ពិសេសការដាក់ចេញ និងការអនុវត្ត នូវក្របខណ្ឌគោលនយោបាយជាតិ ស្តីពីគាំពារសង្គម។
បន្ថែមពីនេះ លោកនាយកប្រចាំតំបន់ បានអបអរសាទរដល់កម្ពុជា ចំពោះភាពជោគជ័យ នៃការសម្រេចបាននូវគោលដៅ សកលមេរោគអេដស៍ ៩៥-៩៥-៩៥ (៩៥% នៃអ្នកផ្ទុកមេរោគអេដស៍ បានដឹងពីស្ថានភាព ផ្ទុកមេរោគអេដស៍របស់ខ្លួន, ៩៥% នៃអ្នកដែលដឹងស្ថានភាពផ្ទុកមេរោគអេដស៍ បានទទួលការព្យាបាល ដោយឱសថប្រឆាំងមេរោគអេដស៍ និង៩៥% នៃអ្នកដែលបានទទួលការព្យាបាល ដោយឱសថប្រឆាំងមេរោគអេដស៍ មានបន្ទុកមេរោគអេដស៍កម្រិតទាប) ដែលឆ្ពោះទៅរកការបញ្ចប់ជំងឺអេដស៍ ដែលជាបញ្ហាគំរាមកំហែង ចំពោះសុខភាពសាធារណៈ នៅឆ្នាំ២០៣០ ។
លោកនាយកប្រចាំតំបន់ បានគូសបញ្ជាក់បន្ថែមថា កម្ពុជាគឺជាប្រទេសមួយ ក្នុងចំណោមប្រទេស៧ ក្នុងពិភពលោក និងជាប្រទេសទីមួយ នៅក្នុងតំបន់អាស៊ី-ប៉ាស៊ីហ្វិក ដែលអាចសម្រេចបានគោលដៅសកលនេះ យ៉ាងត្រចះត្រចង់ និងបានលើកទឹកចិត្តឱ្យកម្ពុជា ចែករំលែកបទពិសោធន៍ជោគជ័យ ទៅកាន់បណ្ដាប្រទេសក្នុងពិភពលោក។ លោកនាយកប្រចាំតំបន់ ក៏បានគូសបញ្ជាក់ថា UNAIDS នៅតែបន្តផ្ដល់នូវការគាំទ្រ ក៏ដូចជាសហការជាមួយកម្ពុជា នៅក្នុងវិស័យសុខាភិបាល ជាពិសេស គឺការប្រយុទ្ធប្រឆាំង នឹងជំងឺអេដស៍នេះ។
ជាការឆ្លើយតប សម្ដេចធិបតីបានវាយតម្លៃខ្ពស់ ចំពោះតួនាទីរបស់អង្គការ សហប្រជាជាតិ នៅក្នុងការរួមចំណែក អភិវឌ្ឍសង្គម-សេដ្ឋកិច្ចកម្ពុជា ជាពិសេសក្នុងវិស័យសុខាភិបាលកម្ពុជា ក៏ដូចជាការគាំទ្រ ដល់កម្មវិធីប្រយុទ្ធនឹងជំងឺអេដស៍ នៅកម្ពុជា។ សម្ដេចធិបតី ក៏បានគូសបញ្ជាក់ថា ទាំងរាជរដ្ឋាភិបាលអាណត្តិមុនៗ រហូតមកដល់រាជរដ្ឋាភិបាលអាណត្តិទី៧នេះ, រាជរដ្ឋាភិបាល នៅតែផ្តល់អាទិភាពខ្ពស់ និងចាត់ទុកប្រជាជនជាស្នូល តាមរយៈការលើកកម្ពស់សុខភាព, ការអប់រំ និងការបង្កើតការងារ ដែលជាគ្រឹះដ៏រឹងមាំសម្រាប់ទ្រទ្រង់ ការរីកចម្រើនរបស់ប្រទេសជាតិ។
បន្ថែមពីនេះ,សម្តេចធិបតី បានគូសបញ្ជាក់ថា រាជរដ្ឋាភិបាល តែងតែយកចិត្តទុកដាក់ខ្ពស់ និងកិច្ចខិតខំលើកកម្ពស់វិស័យសុខាភិបាល តាមរយៈការធ្វើឱ្យកាន់តែប្រសើរឡើង មូលដ្ឋានសុខាភិបាលទាំងថ្នាក់ជាតិ និងថ្នាក់មូលដ្ឋាន។ ព្រមជាមួយគ្នានេះ, សម្ដេចធិបតី បានបន្ថែមថា ទោះបីជាកម្ពុជា សម្រេចបានសមិទ្ធផលជាច្រើន ក្នុងវិស័យសុខាភិបាលក្តី, កម្ពុជា នៅតែចាត់ទុកជំងឺអេដស៍ និងជំងឺឆ្លងនានា ជាហានិភ័យចម្បង ចំពោះសុខភាពសាធារណៈ ដែលរាជរដ្ឋាភិបាល ត្រូវបន្តដោះស្រាយ និងយកចិត្តទុកដាក់ខ្ពស់ជានិច្ច។
សម្ដេចធិបតី បានលើកទឹកឱ្យ UNAIDS បន្តការផ្សារភ្ជាប់ទំនាក់ទំនង និងពង្រឹងកិច្ចសហប្រតិបត្តិការជាមួយកម្ពុជា ក្នុងការអភិវឌ្ឍវិស័យសុខាភិបាល ព្រមទាំងបានគូសបញ្ជាក់ថា រាជរដ្ឋាភិបាលកម្ពុជា ត្រៀមខ្លួនជាស្រេច ក្នុងការគាំទ្រ និងសហការជាមួយ អង្គការសហប្រជាជាតិ ព្រមទាំងដៃគូអភិវឌ្ឍន៍នានា ដើម្បីឈានទៅសម្រេចបាន នូវសមិទ្ធផលថ្មីៗជាបន្តបន្ទាប់ បន្ថែមទៀត៕
