សង្គ្រាមនឹងពង្រីកវិសាលភាព ហួសពីតំបន់ ប្រសិនបើអាមេរិកវាយប្រហារ ប្រឆាំងអ៊ីរ៉ង់ម្តងទៀត
តេអេរ៉ង់៖ ទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍ថា មេបញ្ជាការយោធាកំពូលអ៊ីរ៉ង់ម្នាក់បានព្រមានថា ប្រសិនបើសហរដ្ឋអាមេរិក ធ្វើការវាយប្រហារម្តងទៀតប្រឆាំងនឹងអ៊ីរ៉ង់ វិសាលភាពនៃសង្គ្រាមនឹងពង្រីកហួសពីតំបន់។
លោក Ali Abdollahi មេបញ្ជាការនៃទីបញ្ជាការកណ្តាលយោធាសំខាន់របស់អ៊ីរ៉ង់ Khatam al-Anbiya បានធ្វើការកត់សម្គាល់នេះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានឲ្យដឹងនៅលើ Truth Social របស់លោកថា សហរដ្ឋអាមេរិក នឹងវាយប្រហារអ៊ីរ៉ង់ “យ៉ាងខ្លាំងនៅយប់នេះ” ហើយនឹងគ្រប់គ្រងហេដ្ឋារចនាសម្ព័ន្ធប្រេង និងឧស្ម័នរបស់ប្រទេសនេះក្នុងពេលឆាប់ៗនេះ។
លោក Abdollahi បានលើកឡើងថា ម៉្យាងវិញទៀត សហរដ្ឋអាមេរិកបាននិយាយអំពីកិច្ចព្រមព្រៀង និងការចរចា ហើយម៉្យាងវិញទៀត បានប្រព្រឹត្ត “ទង្វើព្យាបាទ” ដោយសង្កត់ធ្ងន់ថា “ភាពផ្ទុយគ្នាយ៉ាងច្បាស់នៅក្នុងសកម្មភាព និងពាក្យសម្ដីរបស់សហរដ្ឋអាមេរិក គឺជាមូលហេតុចម្បងនៃភាពអសន្តិសុខនៅក្នុងតំបន់”។
លោក Abdollahi បានសង្កត់ធ្ងន់ថា សហរដ្ឋអាមេរិកមិនអាចទូទាត់សងសម្រាប់ “ភាពអាម៉ាស់ និងការបរាជ័យជាបន្តបន្ទាប់” របស់ខ្លួននៅក្នុងសង្គ្រាមជាមួយអ៊ីរ៉ង់ ឬលាក់បាំង “ការញុះញង់សង្គ្រាម” របស់ខ្លួនតាមរយៈការឃោសនា និងសង្គ្រាមប្រព័ន្ធផ្សព្វផ្សាយនោះទេ។
លោកបានព្រមានថា ប្រសិនបើសហរដ្ឋអាមេរិក ស្វែងរកការវាយប្រហារម្តងទៀតប្រឆាំងនឹងអ៊ីរ៉ង់ វានឹងទទួលបានការឆ្លើយតបកាន់តែធ្ងន់ធ្ងរ ហើយវិសាលភាពនៃសង្គ្រាម បន្ថែមពីលើការបង្កអសន្តិសុខនៅក្នុងតំបន់ នឹងកាន់តែទូលំទូលាយ និងរីករាលដាល។ នៅល្ងាចថ្ងៃព្រហស្បតិ៍ លោក ត្រាំ បានឲ្យដឹងនៅលើ Truth Social ថា លោកបានលុបចោលការវាយប្រហារតាមកាលវិភាគ និងការទម្លាក់គ្រាប់បែកប្រឆាំងនឹងអ៊ីរ៉ង់ ដោយលើកឡើងពីវឌ្ឍនភាពក្នុងការចរចាដែលកំពុងដំណើរការ។
ប៉ុន្តែប្រធានាធិបតីបានកត់សម្គាល់ថា ការបិទផ្លូវកងទ័ពជើងទឹកនឹង “នៅតែមានសុពលភាព និងមានប្រសិទ្ធភាពពេញលេញ” រហូតដល់ប្រតិបត្តិការមួយត្រូវបានបញ្ចប់ ដោយបន្ថែមថា ពេលវេលា និងទីកន្លែងនៃការចុះហត្ថលេខានឹងត្រូវបានប្រកាសក្នុងពេលឆាប់ៗនេះ៕
ប្រែសម្រួល ឈូក បូរ៉ា
