លោក កែវ រតនៈ អញ្ជើញជួបសំណេះសំណាល និងស្វែងយល់ពីសុខទុក្ខរបស់អាជីវករ ភូមិវាលវង់ឃុំស្នាអន្សា ស្រុកក្រគរ ខេត្តពោធិ៍សាត់
ពោធិ៍សាត់៖ នារសៀលថ្ងៃសៅរ៍ទី២៧ ខែមិថុនា ឆ្នាំ២០២៦ នេះ លោក កែវ រតនៈ រដ្ឋមន្ត្រីក្រសួងរ៉ែនិងថាមពល និង ជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តពោធិ៍សាត់ និងលោក ខូយ រីដា អភិបាលខេត្តបានអញ្ជើញជាអធិបតីក្នុងពិធីសំណេះសំណាលដ៏ស្និទ្ធស្នាលមួយ ជាមួយបងប្អូនអាជីវករ អាជីវការិនី ដែលកំពុងប្រកបរបរអាជីវកម្មនៅក្នុង ខេត្តពោធិ៍សាត់។
នាឱកាសនោះដែរ ត្រូវបានរៀបចំឡើងក្នុងគោលបំណងស្វែងយល់ពីស្ថានភាពរស់នៅ ឱកាសប្រកបរបរទទួលទាន ក៏ដូចជាការស្តាប់នូវរាល់បញ្ហាប្រឈម និងសំណូមពរផ្សេងៗរបស់បងប្អូនអាជីវករផ្ទាល់ ដើម្បីរួមគ្នាស្វែងរកដំណោះស្រាយ និងជំរុញសេដ្ឋកិច្ចក្នុងមូលដ្ឋានឱ្យកាន់តែមានការរីកចម្រើន។
ប្រសាសន៍គន្លឹះ៖ លោក កែវ រតនៈ បានសង្កត់ធ្ងន់ថា អាជីវករក្នុងស្រុក គឺជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចសហគមន៍ឱ្យមានដង្ហើម។ រាជរដ្ឋាភិបាល ក៏ដូចជាក្រុមការងារចុះជួយមូលដ្ឋាន តែងតែនៅជាប់ជាមួយប្រជាពលរដ្ឋ និងត្រៀមខ្លួនជានិច្ចក្នុងការគាំទ្រ និងដោះស្រាយរាល់ការលំបាកនានា ដើម្បីលើកកម្ពស់ជីវភាពរស់នៅរបស់បងប្អូនឱ្យកាន់តែប្រសើរឡើង។
ពិធីសំណេះសំណាលនេះ បានបញ្ចប់ទៅក្រោមបរិយាកាសរីករាយ ស្និទ្ធស្នាល និងយោគយល់គ្នាខ្ពស់ ដោយបងប្អូនអាជីវករទាំងអស់បានថ្លែងអំណរគុណយ៉ាងជ្រាលជ្រៅចំពោះ លោក កែវ រតនៈ ដែលតែងតែចំណាយពេល និងយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋនៅមូលដ្ឋានខេត្តពោធិ៍សាត់នាពេលកន្លងមក៕
អត្ថបទនេះ- ខេម៉ា | ដើមអម្ពិល
