អ៊ីរ៉ង់ អះអាងថា ការឈប់បំពេញកាតព្វកិច្ចក្រោម MOU គឺដោយសារអាមេរិក រំលោភលើការប្តេជ្ញាចិត្ត
តេអេរ៉ង់៖ អនុរដ្ឋមន្ត្រីការបរទេសអ៊ីរ៉ង់ទទួលបន្ទុកផ្នែកច្បាប់ និងកិច្ចការអន្តរជាតិ លោក Kazem Gharibabadi បានឧ្យដឹងថា អ៊ីរ៉ង់បានបញ្ឈប់ការបំពេញកាតព្វកិច្ចរបស់ខ្លួនក្រោមអនុស្សរណៈនៃការយោគយល់គ្នាសន្តិភាព (MoU) ជាមួយសហរដ្ឋអាមេរិក ដោយសារទីក្រុងវ៉ាស៊ីនតោន បានរំលោភលើការប្តេជ្ញាចិត្តរបស់ខ្លួនក្រោមកិច្ចព្រមព្រៀងនេះ។
នៅក្នុងបទសម្ភាសន៍ជាមួយទូរទស្សន៍ IRIB ដែលគ្រប់គ្រងដោយរដ្ឋ លោក Gharibabadi បានឧ្យដឹងថា សហរដ្ឋអាមេរិកបានរំលោភ ឬផ្អាក “ការប្តេជ្ញាចិត្តទាំងអស់របស់ខ្លួន” ក្រោមអនុស្សរណៈនៃការយោគយល់គ្នា ដោយសង្កត់ធ្ងន់ថា អ៊ីរ៉ង់ ឥឡូវនេះកំពុងផ្តោតលើការការពារខ្លួន ហើយ “គ្មានដំណឹងនៃការចរចានោះទេ”។
លោកបានលេីកឡេីងថា “អ្វីដែលយើងកំពុងប្រឈមមុខនាពេលបច្ចុប្បន្ន គឺការការពារប្រទេសតាមរបៀបដ៏ម៉ឺងម៉ាត់ លើកនេះដែរ អាមេរិក បានទទួលចម្លើយរបស់ពួកគេរួចហើយថា សកម្មភាពឈ្លានពានទាំងនេះនឹងមិននាំទៅរកកន្លែងណាទេ។ ប្រសិនបើពួកគេមានប្រាជ្ញា ពួកគេគួរតែជ្រើសរើសដំណោះស្រាយផ្សេងទៀត”។
សហរដ្ឋអាមេរិក បានបើកការវាយប្រហារជាបន្តបន្ទាប់ទៅលើទីតាំងយោធា និងហេដ្ឋារចនាសម្ព័ន្ធនៅក្នុងខេត្តភាគខាងត្បូងរបស់អ៊ីរ៉ង់ក្នុងសប្តាហ៍កន្លងមក ដោយអះអាងថាការវាយប្រហារទាំងនោះមានគោលបំណង «ធ្វើឱ្យចុះខ្សោយសមត្ថភាពរបស់អ៊ីរ៉ង់ក្នុងការគំរាមកំហែងដល់ការដឹកជញ្ជូនពាណិជ្ជកម្ម» នៅក្នុងច្រកសមុទ្រហ័រមូស៕
ប្រែសម្រួល ឈូក បូរ៉ា
