ការគំរាមកំហែង ត្រីភាគី ដោយសហរដ្ឋអាមេរិក ជប៉ុន និងកូរ៉េខាងត្បូង អាចនាំឱ្យមានវិបត្តិសន្តិសុខថ្មី នៅអាស៊ីប៉ាស៊ីហ្វិក
ព្យុងយ៉ាង ៖ ទីភ្នាក់ងារសារព័ត៌មានកណ្តាលកូរ៉េ (KCNA) បានចុះផ្សាយថា សហរដ្ឋអាមេរិក ជប៉ុន និងកូរ៉េខាងត្បូង ត្រៀមខ្លួនរួចជាស្រេច ដើម្បីបង្កការគំរាមកំហែង “ត្រីភាគី” ដោយធ្វើសមយុទ្ធរួមគ្នា ដើម្បីពង្រឹងសមត្ថភាពរបស់ពួកគេក្នុងការអនុវត្តសង្គ្រាមរួមគ្នា ដែលអាចនាំឱ្យមាន “វិបត្តិសន្តិសុខថ្មីនៅក្នុងតំបន់អាស៊ីប៉ាស៊ីហ្វិក”។
ការគំរាមកំហែងដែលបង្កឡើង ដោយ “ត្រីភាគី” នៃប្រទេសទាំងបី កំពុងលេចចេញជារូបរាងធំ ខណៈដែលពួកគេមិនអើពើនឹង ការព្រួយបារម្ភអំពីសន្តិសុខរបស់ប្រទេសក្នុងតំបន់ ហើយកំពុងពង្រឹងសមត្ថភាពរបស់ពួកគេជាលំដាប់ក្នុងការអនុវត្តសង្គ្រាមរួមគ្នា ដើម្បីធានាបាននូវគុណសម្បត្តិយោធា ។
អត្ថបទនេះបានកត់សម្គាល់ថា កូរ៉េខាងត្បូង និងជប៉ុន បានដើរតួនាទីជាមេបញ្ជាការក្នុងអំឡុងពេលសមយុទ្ធ RIMPAC ថ្មីៗនេះ ដោយហៅវាថាជាសញ្ញាច្បាស់លាស់ ដែលបង្ហាញពីការប៉ុនប៉ងជាយុទ្ធសាស្ត្ររបស់សហរដ្ឋអាមេរិក រដ្ឋនានាដើម្បីបង្កើតអនុត្តរភាពយោធា ដាច់ខាតនៅក្នុងតំបន់អាស៊ីប៉ាស៊ីហ្វិក ដោយដាក់បន្ទុកសន្តិសុខបន្ថែមទៀត លើសម្ព័ន្ធមិត្តអាស៊ីទាំងពីររបស់ខ្លួន។
ទាក់ទងនឹងតំបន់ជុំវិញឧបទ្វីបកូរ៉េ បទអត្ថាធិប្បាយនេះបានឧ្យដឹងថា សហរដ្ឋអាមេរិក និងកូរ៉េខាងត្បូងបានធ្វើសមយុទ្ធផ្លូវអាកាសរួមគ្នា និងបានធ្វើការបណ្តុះបណ្តាលទ្រទ្រង់រួមគ្នាក្នុងទ្រង់ទ្រាយធំ ដែលមិនធ្លាប់មានពីមុនមក។
ទន្ទឹមនឹងនេះ សហរដ្ឋអាមេរិក កំពុងពន្លឿនការផ្លាស់ប្តូរកងកម្លាំងសហរដ្ឋអាមេរិកនៅក្នុងប្រទេសជប៉ុន ទៅជាបញ្ជាការយោធារួបរួមដែលមានសមត្ថភាពប្រតិបត្តិការឯករាជ្យ ក្នុងកិច្ចខិតខំប្រឹងប្រែង ដើម្បីពង្រឹងភាពស៊ីសង្វាក់គ្នានៃបញ្ជាការជាមួយបញ្ជាការប្រតិបត្តិការរួមបញ្ចូលគ្នានៃកងកម្លាំងការពារខ្លួនរបស់ប្រទេសជប៉ុន៕
