រុស្ស៊ី ជំរុញឱ្យជប៉ុន ទទួលស្គាល់យ៉ាងពេញលេញនូវ លទ្ធផលនៃសង្គ្រាមលោកលើកទី២ និងបញ្ឈប់ការបិទបាំងការឈ្លានពានរបស់ខ្លួនក្នុងសម័យសង្គ្រាម
មូស្គូ៖ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានជំរុញឱ្យប្រទេសជប៉ុន ទទួលស្គាល់យ៉ាងពេញលេញនូវលទ្ធផលនៃសង្គ្រាមលោកលើកទី២ និងបញ្ឈប់ការប៉ុនប៉ងបិទបាំងប្រវត្តិសាស្ត្រឈ្លានពានរបស់ខ្លួន។
ឆ្លើយតបទៅនឹងសំណួររបស់អ្នកយកព័ត៌មានទីភ្នាក់ងារសារព័ត៌មានស៊ីនហួ លោកស្រី Zakharova បានឧ្យដឹងថា នៅក្នុងព្រឹត្តិការណ៍រំលឹកខួបលើកទី៨១ នៃការប្រកាសចុះចាញ់ដោយគ្មានលក្ខខណ្ឌរបស់ជប៉ុន រដ្ឋាភិបាលជប៉ុន មិនត្រឹមតែបរាជ័យក្នុងការទទួលស្គាល់ជាសាធារណៈនូវការឈ្លានពានរបស់ខ្លួននៅក្នុងតំបន់អាស៊ីប៉ាស៊ីហ្វិក សុំទោសដោយស្មោះចំពោះប្រជាជននៃប្រទេសជិតខាងដែលបានរងទុក្ខដោយសារវា និងបញ្ជាក់ជាថ្មីនូវការប្តេជ្ញាចិត្តរបស់ខ្លួន ចំពោះបទប្បញ្ញត្តិសន្តិភាពនិយមនៃរដ្ឋធម្មនុញ្ញរបស់ខ្លួនប៉ុណ្ណោះទេ ប៉ុន្តែផ្ទុយទៅវិញបានបន្តដំណើរនៃការធ្វើយោធាឡើងវិញ ដោយកំពុងធ្វើដំណើរតាមផ្លូវដ៏គ្រោះថ្នាក់កាន់តែខ្លាំងឡើង។
លោកស្រី Zakharova បានបន្ដថា «អ្វីដែលហៅថាការលាងសម្អាតឧក្រិដ្ឋកម្មសម័យសង្គ្រាមរបស់ប្រទេសជប៉ុន ការកែសម្រួលគោលការណ៍ជាមូលដ្ឋាននៃរដ្ឋធម្មនុញ្ញរបស់ខ្លួន និងការពិភាក្សាឡើងវិញលើការកែសម្រួលអ្វីដែលខ្លួនហៅថា «គោលការណ៍មិនមែននុយក្លេអ៊ែរទាំងបី» សុទ្ធតែកំពុងកើតឡើងប្រឆាំងនឹងផ្ទៃខាងក្រោយនៃការបង្ខូចទ្រង់ទ្រាយនៃការពិតប្រវត្តិសាស្ត្រ»។
លោកស្រីបន្ថែមថា សុន្ទរកថារបស់នាយករដ្ឋមន្ត្រីជប៉ុនលោកស្រី Sanae Takaichi នៅឯពិធីរំលឹកវិញ្ញាណក្ខន្ធជាតិ សម្រាប់អ្នកស្លាប់ក្នុងសង្គ្រាម ពិធីបូជារបស់លោកស្រីនៅទីសក្ការៈ Yasukuni និងកាយវិការផ្សេងទៀតឆ្ពោះទៅរកទីសក្ការៈ ក៏ដូចជាការទៅទស្សនាទីសក្ការៈដោយមន្ត្រីរដ្ឋាភិបាលជប៉ុន រួមទាំងរដ្ឋមន្ត្រីក្រសួងការពារជាតិលោក Shinjiro Koizumi សុទ្ធតែជាការបង្ហាញពីដំណើរយោធាឡើងវិញរបស់ប្រទេសនេះ៕
ប្រែសម្រួល ឈូក បូរ៉ា
