ទីក្រុងហូជីមិញ ត្រូវការកម្លាំងពលកម្ម ជំនាញរហូតដល់ ៧ ម៉ឺននាក់ ដើម្បីអភិវឌ្ឍបណ្ដាញរថភ្លើងអគ្គិសនី (Metro)
ទីក្រុងហូជីមិញ៖ ប្រទេសវៀតណាម កំពុងប្រឈមមុខនឹងកង្វះខាតកម្លាំងពលកម្មជំនាញបច្ចេកទេស កម្រិតខ្ពស់រាប់ម៉ឺននាក់ សម្រាប់គម្រោងអភិវឌ្ឍន៍បណ្ដាញ ផ្លូវដែកទីក្រុង (Metro) របស់ខ្លួន ខណៈដែលធនធានមនុស្សនា ពេលបច្ចុប្បន្នអាចឆ្លើយតបបានត្រឹមតែមួយ ភាគតូចប៉ុណ្ណោះនៃតម្រូវការជាក់ស្តែង នេះបើយោងតាមការចេញផ្សាយពីសារព័ត៌មាន VE Express ថ្ងៃទៅ១៥ ខែកញ្ញា ឆ្នាំ២០២៦។
យោងតាមគម្រោងបណ្តុះបណ្តាលធនធានមនុស្ស ដែលត្រូវបានអនុម័តដោយគណៈកម្មាធិការប្រជាជនទីក្រុង បានបង្ហាញថា ទីក្រុងសេដ្ឋកិច្ចមួយនេះនឹងត្រូវការបុគ្គលិកប្រមាណ ៧០ ០០០ នាក់ ត្រឹមឆ្នាំ ២០៣០ ដើម្បីគាំទ្រដល់ការវិនិយោគ និងការអភិវឌ្ឍប្រព័ន្ធរថភ្លើងអគ្គិសនីរបស់ខ្លួន។
លោក Le Minh Triet នាយកក្រុមហ៊ុនផ្លូវដែកទីក្រុងហូជីមិញលេខ១ (HURC1) បានបញ្ជាក់ថា គ្រាន់តែការដាក់ឱ្យដំណើរការខ្សែរថភ្លើង Metro លេខ១ (Bến Thành – Suối Tiên) តែមួយខ្សែ គឺតម្រូវឱ្យមានបុគ្គលិកជំនាញរាប់រយ ទៅដល់ជិត ១ ០០០ នាក់បាត់ទៅហើយ ដើម្បីធានាដល់ប្រតិបត្តិការជើងរថភ្លើងជិត ២០០ ជើងជារៀងរាល់ថ្ងៃ។
នៅពេលដែលទីក្រុងបន្តវិនិយោគលើខ្សែរថភ្លើង ជាច្រើនខ្សែទៀតនាពេលខាងមុខ តម្រូវការធនធានមនុស្សនឹងកើនឡើងយ៉ាងគំហុក។ ក្នុងចំណោមតម្រូវការបុគ្គលិក ៧ ម៉ឺននាក់ត្រឹមឆ្នាំ ២០៣០។
មិនត្រឹមតែត្រឹមឆ្នាំ ២០៣០ នោះទេ ផែនការរយៈពេលវែងពីឆ្នាំ ២០៣០ ដល់ ២០៤៥ ទីក្រុងនឹងត្រូវការធនធានមនុស្សកើនឡើងទ្វេដង ដើម្បីត្រៀមខ្លួនគ្រប់គ្រងបណ្តាញរថភ្លើង Metro ដែលមានប្រវែងរហូតដល់ ៧០០ គីឡូម៉ែត្រ។
តម្រូវការដ៏ធំធេងនេះ កំពុងជំរុញឱ្យសាកលវិទ្យាល័យ និងវិទ្យាស្ថានស្រាវជ្រាវនានា ដាក់អាទិភាពខ្ពស់លើការបណ្តុះបណ្តាលវិស្វករឯកទេសគុណភាពខ្ពស់ ជាពិសេសផ្នែកដឹកជញ្ជូនវៃឆ្លាត (Smart Transportation)។ គោលដៅចម្បងគឺបង្កើតវិស្វករជំនាន់ថ្មី ដែលមានសមត្ថភាពគ្រប់គ្រងគម្រោងហេដ្ឋារចនាសម្ព័ន្ធតម្លៃ “រាប់ពាន់លានដុល្លារ” ដោយខ្លួនឯង។
លោក Nguyen Quoc Trung អគ្គនាយករងក្រុមហ៊ុន Dai Quang Minh (អ្នកម៉ៅការសាងសង់ Metro ខ្សែលេខ២) បានសង្កត់ធ្ងន់ថា ការបណ្តុះបណ្តាល និងធ្វើស្តង់ដារធនធានមនុស្សត្រូវតែជាកត្តាអាទិភាព ដោយហេតុថា “ប្រទេសវៀតណាមមិនអាចបន្តពឹងផ្អែកលើអ្នកជំនាញបរទេសរហូតនោះទេ”។
ជាការឆ្លើយតបទៅនឹងបញ្ហានេះ ថ្មីៗនេះអាជ្ញាធរគ្រប់គ្រងផ្លូវដែកទីក្រុង (MAUR) និងក្រុមហ៊ុនបច្ចេកវិទ្យា-ទូរគមនាគមន៍សកល (GTEL) បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការស្រាវជ្រាវរួមបញ្ចូលប្រព័ន្ធ និងការផ្ទេរបច្ចេកវិទ្យា។ កិច្ចសហប្រតិបត្តិការនេះ នឹងផ្តោតជាបន្ទាន់លើការស្រាវជ្រាវ និងការអនុវត្តសម្រាប់គម្រោង Metro ខ្សែលេខ២ និងគម្រោងផ្លូវដែកទីក្រុងផ្សេងទៀត ដែលនឹងត្រូវអនុវត្តចន្លោះឆ្នាំ ២០២៦ ដល់ ២០៣០ នេះ។
ប្រែសម្រួល៖ គីរី
